శ్రావణి హత్య కేసులో పోలీసుల దర్యాప్తు ముమ్మరం

యాదాద్రి జిల్లా బొమ్మల రామారంలో శ్రావణి హత్య కేసులో పోలీసులు దర్యాప్తు వేగంవంతం చేశారు.  ఈ కేసులో ఓ యువకుణ్ని అదుపులోకి తీసుకున్నారు. 24 గంటల్లోనే కేసును ఛేదించి నిందితులను పట్టుకుంటామని సీపీ తెలిపారు. ఈ కేసులో ఫోరెన్సిక్​ నివేదిక విచారణకు కీలకం కానుంది.

యాదాద్రి భువనగిరి జిల్లా బొమ్మల రామారంలో శ్రావణి హత్య కేసుకు సంబంధించి ఓ యువకుణ్ని ఇవాళ ఉదయం పోలీసులు అదుపులోకి తీసుకున్నారు. తమకు న్యాయం చేయాలంటూ కుటుంబ సభ్యులు, గ్రామస్థులు, ప్రజాసంఘాలు భువనగిరి జాతీయ రహదారిపై రాస్తారోకో చేశారు. తమకు స్పష్టమైన హామీ వచ్చే వరకూ అంత్యక్రియలు నిర్వహించబోమని బొమ్మల రామారంలో మృతదేహంతో నిరసన తెలిపారు.

ఫోరెన్సిక్​ నివేదికతో స్పష్టత

శ్రావణి హత్య కేసులో ఫోరెన్సిక్​ నివేదిక కీలకం కానుంది. ఊపిరి ఆడకపోవడం వల్లే చనిపోయినట్లు శవ పంచనామాలో నిర్ధరణకు వచ్చారు. శరీరం లోపల ఎడమ భాగంలో 4 పక్కటెముకలు విరిగాయని జిల్లా ఆస్పత్రి సూపరింటెండెంట్​ కోట్యా నాయక్​ తెలిపారు.

నిందితులను పట్టుకుంటాం

నిందితులను పట్టుకునేందుకు ప్రత్యేక బృందాలు ఏర్పాటు చేశామని భువనగిరి డీసీపీ నారాయణరెడ్డి తెలిపారు. విధుల్లో నిర్లక్ష్యంగా వ్యవహరించారని ఆరోపణలు వస్తున్న బొమ్మల రామారం ఎస్సై వెంకటేశ్​ను సీపీ కార్యాలయానికి అటాచ్​ చేసినట్లు పేర్కొన్నారు.

24 గంటల్లో కేసును ఛేదిస్తాం

బొమ్మల రామారంలో మృతదేహంతో ధర్నా చేస్తున్న కుటుంబ సభ్యులను సీపీ మహేశ్​ భగవత్​ పరామర్శించారు. 24 గంటల్లోనే కేసును ఛేదిస్తామని స్పష్టం చేశారు. నిందితులను కఠినంగా శిక్షిస్తామని హామీనిచ్చారు. సీపీ మహేశ్​ భగవత్​ హామీతో బంధువులు ఆందోళన విరమించి మృతదేహాన్ని హాజీపూర్​కు తరలించారు.

ముగిసిన అంత్యక్రియలు

పటిష్ఠ పోలీసు బందోబస్తు నడుమ హాజీపూర్​లో శ్రావణి అంత్యక్రియలు ముగిశాయి. బంధువులు, గ్రామస్థులు అశ్రు నయనాలతో తుది వీడ్కోలు పలికారు.

ఇదీ చదవండి : అదృశ్యమైన బాలిక మృతదేహం గుర్తింపు