తొలిరోజు జోరుగా సాగిన నామినేషన్​ ప్రక్రియ

మున్సిపల్​ ఎన్నికల నామినేషన్​ పర్వం ప్రారంభం కావడం వల్ల ఉమ్మడి నల్గొండ జిల్లాలోని మున్సిపల్​ కార్యాలయాలన్నీ నామినేషన్లు దాఖలు చేయడానికి  వచ్చిన అభ్యర్థులతో కళకళలాడాయి. చౌటుప్పల్​, మోత్కూరు, నాగార్జున సాగర్​ నియోజకవర్గాల్లో తొలిరోజు వివిధ పార్టీల అభ్యర్థులు నామినేషన్లు వేశారు.

ఉమ్మడి నల్గొండ జిల్లాలో మున్సిపల్​ ఎలక్షన్ల నామినేషన్​ పర్వం మొదలైంది. చౌటుప్పల్, మోత్కూరు, నాగార్జున సాగర్​ నియోజకవర్గాల్లో మున్సిపల్ కార్యాలయాలు కోలాహలంగా మారింది. నామినేషన్లు వేయడానికి భారీ సంఖ్యలో వివిధ పార్టీల నుంచి తరలివచ్చిన అభ్యర్థులతో మున్సిపల్ కార్యాలయాలు కిక్కిరిశాయి.

చౌటుప్పల్​ మున్సిపల్ పరిధిలోని 20 వార్డులకు గాను నామినేషన్లు స్వీకరించారు. ఎన్నికల ప్రత్యేక అధికారి సురేశ్​ కుమార్ పర్యవేక్షణలో ఎన్నికల సిబ్బంది.. నామినేషన్లకు వస్తున్న అభ్యర్థులకు హెల్ప్ డెస్క్ ఏర్పాటు చేసి వారికి నామినేషన్ల ఫారం గురించి క్లుప్తంగా వివరిస్తున్నారు. మోత్కూరు పరిధిలోని 12 వార్డులకు గాను బుధవారం రోజు వరకు 7 నామినేషన్లు దాఖలయ్యాయి.

నాగార్జున సాగర్​ నియోజకవర్గం పరిధిలోని నందికొండ, హాలియా రెండు పురపాలికల్లో నామినేషన్ల పర్వం సాదాసీదాగా జరిగింది. నందికొండలోని 12 వార్డులకు గాను తొలిరోజు 5 నామినేషన్లు దాఖలయ్యాయి. హాలియా మున్సిపాలిటీ పరిధిలో 12 వార్డులు ఉండగా మొత్తం 17 నామినేషన్లు దాఖలయ్యాయి.

ఇదీ చూడండి : 'ఎన్నికల్లో ధన ప్రవాహం విచ్చలవిడిగా పెరిగింది'