రెండు నెలలుగా అక్రమంగా చెరువులోని మట్టి తరలింపు

యాదాద్రి భువనగిరి జిల్లాలో ఓ చెరువు నుంచి మట్టిని కొందరు అక్రమంగా తరలిస్తున్నారు. అనుమతులు లేకుండానే యథేచ్ఛగా తమ ఊరి చెరువులో మట్టిని తవ్వుతున్నారని స్థానికులు ఆరోపిస్తున్నారు. అధికారులు తమకు తెలియదని చెబుతున్నా.. రెండు నెలలుగా జరుగుతున్న ఈ మట్టి తవ్వకం వారికి తెలిసే జరుగుంతుందని గ్రామస్థులు ఆగ్రహం వ్యక్తం చేస్తున్నారు.

యాదాద్రి భువనగిరి జిల్లా మోటకొండూరు మండలం కాటెపల్లిలో నల్ల చెరువు నుంచి మట్టిని కొందరు అక్రమంగా తరలిస్తున్నారు. మండలంలో కాటెపల్లిలో గల నల్ల చెరువు నుంచి.. గత రెండు నెలలుగా మట్టిని అనుమతులు లేకుండా గుత్తేదారులు మట్టిన అక్రమంగా తరలిస్తున్నారని స్థానికులు ఆరోపిస్తున్నారు. మండలంలోని కొండాపూర్, ముత్తిరెడ్డిగూడెం, కాటెపల్లిలలోని ప్రధాన రహదారి పనులు జరుగుతుండగా అక్కడికి ఈ మట్టిని చేరవేస్తున్నారు. చెరువులో సుమారు 30 మీటర్ల లోతు వరకు మట్టిని యథేచ్ఛగా తవ్వుతున్నారు. ప్రభుత్వ నిబంధనలు అంతలోతు వరకు తవ్వకూడదనే చెబుతున్నాయి. ఆయినప్పటికీ.. గుత్తేదారులు అదేం పట్టించుకోవటం లేదు. కొందరు వ్యక్తులు ప్రజాప్రతినిధులతో కుమ్మక్కై ఈ తతంగం నడిపిస్తున్నారని, అధికారులకు తెలిసే ఇదంతా జరుగుతుందని స్థానికులు ఆరోపిస్తున్నారు.

మట్టిని తరలిస్తున్న వాహనాలు

'మట్టిని తరలించటానికి అనుమతులు లేవు'

ఈ విషయంపై స్థానిక తహసీల్దార్​ను వివరణ కోరగా తమ దృష్టికి లేదన్నారు. మట్టిని తరలించటానికి ఎటువంటి అనుమతులు లేవని స్పష్టం చేశారు. అనుమతులు లేకుండా మట్టి తరలింపును చేపడితే చట్టపరమైన చర్యలు తీసుకుంటామని హెచ్చరించారు. మట్టి తరలించే స్థలానికి ఆర్ఐ శ్రీనివాస్ రెడ్డిని పంపించారు.

ఆర్ఐ వస్తున్నాడని తెలియగానే మట్టిని తరలించే వాహనాలు కొన్ని అక్కడ నుంచి వెళ్లిపోయాయి. మరికొన్ని ఆర్ఐ వచ్చిన తరువాత వెళ్లిపోయాయి. మట్టి తవ్వే వాహనం మాత్రం అక్కడే ఉండిపోయింది. మట్టి తరలించే వారిని తరలింపునకు సంబందించి అనుమతి పత్రాలని చూపించాలని కోరగా వారు చూపించలేదు. మట్టిని తరలించవద్దని ఆర్​ఐ హెచ్చరించి వెళ్ళిపోయారు.

ఆర్ఐ వెళ్లిన కొద్దిసేపటికే మళ్లీ మట్టి తరలింపు ప్రారంభం

అధికారి వెళ్లగానే మట్టి తరలింపును మళ్లీ ప్రారంభించారు. విషయం మళ్లీ తహసీల్దార్ దృష్టికి తీసుకెళ్లగా.. ఆయన స్థానిక వీఆర్​ఏ మత్స్యగిరిని అక్కడకు పంపించడంతో.. ఆయన మట్టిని తరలించే వాహనాలు, మట్టిని తవ్వే వాహనాన్ని అక్కడ నుంచి పంపించేశారు. అధికారులకు తెలియకుండా గత రెండు నెలల నుంచి మట్టి తరలించే అవకాశం లేదని గ్రామస్థులు తెలుపుతున్నారు. తమ చెరువు మట్టిని కాపాడాలని అధికారులకు ప్రజలు విజ్ఞప్తి చేస్తున్నారు.

ఇదీ చూడండి: లంగ్స్​పై డెల్టా ప్లస్ వేరియంట్​ ప్రభావమెంత?