హైదరాబాద్ నుంచి సొంతూరు వెళ్లవారితో టోల్గేట్ల వద్ద రద్దీ ఏర్పడింది. హైదరాబాద్‌తో పాటు తెలంగాణలోని ఇతర జిల్లాల నుంచి ఆంధ్రప్రదేశ్‌లోని వివిధ ప్రాంతాల్లోని స్వస్థలాలకు భారీగా ప్రజలు వాహనాల్లో బయలుదేరారు. ఫాస్ట్‌ ట్యాగ్‌ ఉన్నప్పటికీ హైదరాబాద్-విజయవాడ జాతీయ రహదారిలో కీసర టోల్‌గేట్‌ వద్ద వాహనాలు బారులు తీరాయి. ట్రాఫిక్‌ రద్దీ నేపథ్యంలో సంక్రాంతి సందర్భంగా వారం రోజుల పాటు టోల్ రుసుము రద్దు చేయాలని వాహనదారులు కోరుతున్నారు.
సాధారణ రోజుల్లో హైదరాబాద్ నుంచి విజయవాడ వైపు 3 నుంచి 4 వేల వాహనాలు ప్రయాణిస్తే, సంక్రాంతి రోజుల్లో 10 నుంచి 18 వేల వాహనాలు వస్తాయి. హైదరాబాద్ నుంచి విజయవాడ చేరే లోపు చౌటుప్పల్‌ మండలం పంతంగి, సూర్యాపేట జిల్లా కొర్ల పహాడ్‌, కృష్ణా జిల్లా చిల్లకల్లు, కీసర వద్ద టోల్ వసూలు కేంద్రాలున్నాయి. ఈ సారి ఆయా కేంద్రాల వద్ద వాహనాల రద్దీని నియంత్రించేందుకు అధికారులు ప్రత్యేక చర్యలు చేపట్టారు.