మరుగుదొడ్ల నిర్వహణకు జాతీయ స్థాయి పురస్కారం

ఇది పవిత్ర ప్రదేశం. బహిరంగ మల విసర్జన చేసే ప్రదేశం కాదు. అందుకోసం మరుగుదొడ్డి ఉపయోగించండి. ఒక చెరువు విలువను చెప్పే సందేశం ఇది. ఈ సందేశాలు, ఆకర్షించే బొమ్మలు ఉన్నది మరెక్కడో కాదు. మరుగుదొడ్ల గోడలపై. వరంగల్‌ అర్బన్‌ జిల్లాలో అనేక గ్రామాల పరిధిలో అందంగా ఉన్న మరుగుదొడ్లు కనిపిస్తున్నాయి. పైపై మెరుగులే కాదు. లోపల కూడా పరిశుభ్రంగా ఉంటున్నాయి.

దేశ రాజధాని దిల్లీలో వరంగల్‌ అర్బన్‌ జిల్లాకు ‘స్వచ్ఛ సుందర్‌ శౌచాలయ్‌’ పురస్కారం దక్కింది. దేశవ్యాప్తంగా 685 జిల్లాలోని 6786 గ్రామాలు పోటీ పడగా, పది జిల్లాలకు మాత్రమే బహుమతి దక్కింది. అందులో రాష్ట్రం నుంచి పెద్దపల్లి జిల్లాతోపాటు, వరంగల్‌ అర్బన్‌ మాత్రమే ఉన్నాయి. పెద్దపల్లి మూడో స్థానంలో నిలవగా, వరంగల్‌ అర్బన్‌ 5వ స్థానంలో నిలిచింది.

మరుగుదొడ్లను కట్టడం ప్రభుత్వం వంతు
ఊరూరా వంద శాతం మరుగుదొడ్లను కట్టడం ప్రభుత్వం వంతు. వాటిని ప్రజలు నిత్యం వాడాలి. పరిశుభ్రంగా నిర్వహించాలి. అప్పుడే స్వచ్ఛ భారత్‌ లక్ష్యం నెరవేరుతుంది. ఇందుకు వరంగల్‌ అర్బన్‌ గ్రామీణాభివృద్ధి శాఖ ఎంతో కృషి చేస్తోంది. ఈ ఏడాది జనవరి 1 నుంచి 31 వరకు స్వచ్ఛ సుందర్‌ శౌచాలయ్‌ పోటీ జరిగింది. ఇందులో భాగంగా కలెక్టర్‌ ప్రశాంత్‌ జీవన్‌ పాటిల్‌ మార్గదర్శనంలో గ్రామీణాభివృద్ధి శాఖ ప్రాజెక్టు డైరెక్టర్‌ రాము అనేక గ్రామాల్లో సమావేశాలు ఏర్పాటు చేశారు. ఉపాధి హామీ సిబ్బంది, సెర్ప్, ఐకేపీ, ఆశ కార్యకర్తలు, అంగన్వాడీ టీచర్లతోపాటు స్థానిక ప్రజాప్రతినిధుల సహకారంతో మరుగుదొడ్ల వినియోగంపై గ్రామాల్లో ప్రచారం నిర్వహించారు.

2017లోనే ఓడీఎఫ్‌’ జిల్లా
2017లోనే వరంగల్‌ అర్బన్‌ జిల్లా వందశాతం మరుగుదొడ్లతో ‘ఓడీఎఫ్‌’ గా ప్రకటించారు. జిల్లా మొత్తం మీద 42,230 మరుగుదొడ్లు నిర్మించారు. పైగా కేవలం నెలరోజుల్లోనే 11 వేలు నిర్మించడం అప్పట్లో రికార్ఢు జిల్లాలో 100 శాతం మరుగుదొడ్లు నిర్మించినందుకు అప్పట్లో స్వచ్ఛ దర్పణ్‌ పురస్కారం కూడా దిల్లీలో అందుకున్నారు.

గ్రామాల ప్రత్యేక ఎంపిక
జిల్లాలోని మరుగుదొడ్లకు సున్నాలు వేయడంతోపాటు పలు గ్రామాల్లో గౌరవ గృహాలను ఆకర్షణీయంగా తీర్చిదిద్దారు. ఇందుకోసం గ్రామీణాభివృద్ధి శాఖ జిల్లాలోని పలు గ్రామాలను ప్రత్యేకంగా ఎంపిక చేసింది. ఎల్కతుర్తి మండలంలోని కోతులనడుమ, భీమదేవరపల్లిలోని కొత్తకొండ, రత్నగిరి, ధర్మసాగర్‌లోని క్యాతంపల్లి, హసన్‌పర్తిలోని గుంటూరుపల్లి తదితర గ్రామాల్లోని కొన్ని గౌరవ గృహాలపై రంగురంగుల బొమ్మలు గీసి, సందేశాలను రాశారు. పెళ్లికి భర్త ఇచ్చే కానుక మరుగుదొడ్డేనని, చెరువుల వద్ద మల విసర్జన చేయరాదని, జాతిపిత గాంధీజీ స్వయంగా తన మరుగుదొడ్డిని శుభ్రం చేసుకునేవారని.. ఇలా అనేక రకాల బొమ్మలను గీయడం ప్రత్యేకంగా నిలిచాయి.

అందరి సహకారంతో సాధ్యమైంది: రాము, గ్రామీణాభివృద్ధి శాఖ పీడీ, వరంగల్‌ అర్బన్‌
పురస్కారం రావడం చాలా సంతోషంగా ఉంది. మరుగుదొడ్లు వంద శాతం నిర్మించాక కూడా కొందరు అలవాటుగా బహిరంగ మల విసర్జన చేస్తుంటే వారిని గుర్తించి గులాబి పూలిచ్చి ఇంట్లో వాడుకోవాల్సిందిగా అవగాహన కల్పించాం. గ్రామాల్లో శౌచాలయాలను శుభ్రం చేసేందుకు మా శాఖ తరఫున కమలాపూర్‌ మండలంలో యూనిట్‌ ఏర్పాటుచేశాం. దీన్నే అన్ని ప్రభుత్వ శాఖల్లో వినియోగించేలా ఉత్తర్వులు ఇవ్వాలని కలెక్టర్‌ను కోరాం. త్వరలో ఇది అమలవుతుంది.

ఇదీ చూడండి : భద్రకాళీ శాకంబరి ఉత్సవాలు నేటితో ప్రారంభం