పట్టు పురుగుల పెంపకం.. దిగుబడి ఆశాజనకం

పట్టు పురుగుల పెంపకంలో సేంద్రీయ విధానాన్ని అవలంభిస్తూ మంచి దిగుబడి సాధిస్తున్నారు వరంగల్​ అర్బన్​ జిల్లాకు చెందిన ప్రతాప్​ అనే రైతు. ఎప్పటికప్పుడు ప్రకృతి వరంగా లభించే ఎరువులతో మల్బరీ పంటకు పిచికారీ చేస్తూ ఆ మొక్కల ఆకులనే పట్టు పురుగులకు మేత వేసి లాభాలు ఆర్జిస్తున్నారు. ఈ పద్ధతిలో వాణిజ్య పంటలను కూడా అద్భుతంగా సాగు చేయవచ్చని నిరూపించి తోటి రైతులకు ఆదర్శంగా నిలుస్తున్నారు.

వరంగల్ అర్బన్ జిల్లా ఎల్కతుర్తి మండలం వల్బాపూర్ గ్రామంలో సేంద్రీయ పద్ధతిలో మల్బరీ పంటను సాగుచేస్తూ.. పట్టు పురుగుల పెంపకం ద్వారా అధిక దిగుబడిని పొందుతున్నారు అంబాల ప్రతాప్ అనే రైతు. తనకున్న ఎకరం వ్యవసాయ భూమిలో పద్నాలుగేళ్లుగా రసాయనిక ఎరువులతో మల్బరీ పంటను పండిస్తూ, పట్టుపురుగుల పెంపకాన్ని చేస్తున్నారు. ఆ విధానంలో పంట దిగుబడి ఆశాజనకంగా లేకపోవడంతో తన స్నేహితుడైన షేక్​ హుస్సేన్​ను సంప్రదించారు. మిత్రుడి సూచనల మేరకు గతేడాది నుంచి సేంద్రీయ విధానంలో సాగు చేస్తున్నారు. దీంతో పంట దిగుబడి గణనీయంగా పెరిగి లాభాలు వస్తున్నట్లు రైతు ప్రతాప్ తెలిపారు.

అధిక దిగుబడి

ఈ విధానం ద్వారా 20 శాతం అధిక దిగుబడి వస్తున్నట్లు రైతు పేర్కొన్నారు. జీవామృతం, ద్రవ జీవామృతాలను మొక్కలకు పట్టిస్తూ, ఆకులు వచ్చిన తర్వాత వాటిని పురుగులు తినకుండా వేప కషాయం, పుల్ల మజ్జిగను ఆకులపై పిచికారీ చేస్తున్నట్లు వివరించారు. నాణ్యతగా వచ్చిన ఈ మల్బరీ ఆకులను పట్టుపురుగులకు మేతగా వేయడం వల్ల పురుగులు బలంగా తయారయ్యాయని చెప్పారు. ఇంతకుముందు రసాయనిక పద్ధతుల ద్వారా 100 గుడ్లకు 50 కిలోల పట్టు గూళ్ల దిగుబడి రాగా.. సేంద్రీయ పద్ధతి ద్వారా 100కు 70 నుంచి 80 కిలోల వరకు అధికంగా వస్తోందని ప్రతాప్ హర్షం వ్యక్తం చేశారు.

ప్రభుత్వ తోడ్పాటు అవసరం

ప్రస్తుతం పట్టు పురుగుల పెంపకం ద్వారా నెలకు రూ. 25వేల నుంచి 30 వేల వరకు ఆదాయం వస్తోందని ప్రతాప్​ పేర్కొన్నారు. ప్రకృతి వ్యవసాయ పద్ధతుల ద్వారా మల్బరీ పంట పండించి పట్టుపురుగుల పెంపకం చేపట్టే విధంగా సెరికల్చర్​ అధికారులు.. రైతులకు శిక్షణా కార్యక్రమాలు ఏర్పాటు చేస్తే ఉపయోగకరంగా ఉంటుందని అభిప్రాయపడ్డారు. తమలాంటి రైతులను ప్రభుత్వం ప్రోత్సహించాలని కోరారు.

ఇదీ చదవండి:అభివృద్ధి సాధించారు.. కేంద్రమంత్రి ప్రశంసలు పొందారు..