'అర్హత ఉండి రైతు బంధు రాకపోతే అధికారులపై చర్యలు'

అర్హత ఉండి కూడా రైతు బంధు రాకపోతే సంబంధిత అధికారులపై చర్యలు చేపడుతామని రాష్ట్ర వ్యవసాయ, మార్కెటింగ్, సహకార శాఖ మంత్రి సింగిరెడ్డి నిరంజన్ రెడ్డి హెచ్చరించారు. ఇప్పటి వరకు రాష్ట్రంలో 55 లక్షల ఐదు వేల మంది రైతులకు సంబంధించిన కోటి 40 లక్షల ఎకరాల భూమికి వర్తించే విధంగా రూ. 7 వేల కోట్లను సంబధిత రైతుల ఖాతాల్లో జమ చేసినట్లు వెల్లడించారు.

వనపర్తి జిల్లా కొత్తకోట, మదనాపురం, అడ్డాకుల మండలాల్లోని పలు గ్రామాల్లోి రైతు వేదికల నిర్మాణానికి శుక్రవారం వ్యవసాయ శాఖ మంత్రి శంకుస్థాపన చేశారు. అంతేకాక తెలంగాణకు హరితహారం కార్యక్రమం కింద మొక్కలు నాటారు.

కరోనా కాలంలో రైతుల సంక్షేమాన్ని దృష్టిలో ఉంచుకుని రాష్ట్ర ప్రభుత్వం, ముఖ్యమంత్రి కేసీఆర్‌ అన్నదాతలకు ఇబ్బందులు కలగకుండా రైతు బంధు పథకం కింద రైతు ఖాతాల్లో పెట్టుబడి నిధులను జమ చేయడం జరిగిందని తెలిపారు. ఇప్పటి వరకు రాష్ట్రంలో 55 లక్షల 5 వేల మంది ఖాతాల్లో రూ. 7 వేల కోట్లను జమ చేసినట్లు వెల్లడించారు. ఇంకా రైతు బంధు రావాల్సిన వారు నాలుగు లక్షలకుపైగా ఉన్నారని మంత్రి పేర్కొన్నారు. న్యాయబద్ధంగా రైతు బంధుకు అర్హత ఉండి రానట్లైతే సంబంధిత అధికారులపై కఠిన చర్యలు తీసుకుంటామని మంత్రి హెచ్చరించారు.

రాబోయే రోజుల్లో వ్యవసాయ విస్తరణ అధికారుల ద్వారా వారి పరిధిలోని ఐదు వేల ఎకరాలకు సంబంధించి సంపూర్ణ సమాచారాన్ని, రైతుల సమాచారంతో సేకరిస్తామని తెలిపారు. రైతులు ఎప్పటిలాగే సాధారణ పంటలు సాగు చేయకుండా వాణిజ్య పంటలపై దృష్టి సారించాలని.. ముఖ్యంగా కూరగాయలు సాగు చేయాలని సూచించారు.

దేవరకద్ర నియోజకవర్గంలో రూ. 22 లక్షలతో నిర్మిస్తున్న 37 రైతు వేదికలను.. రెండు, మూడు నెలల్లో పూర్తి చేసేందుకు చర్యలు తీసుకున్నామని ఎమ్మెల్యే ఆల వెంకటేశ్వర రెడ్డి తెలిపారు. రైతు వేదికల ద్వారా అన్నదాతలు వారికి సంబంధించిన అన్ని విషయాలను టీవీలు, స్త్రీన్ల ద్వారా తెలుసుకోవచ్చన్నారు.

ఇదీ చూడండి:ప్రధాన కార్యదర్శితో సహా 100 మంది ఐఏఎస్​ల బదిలీ