గుంతల్లో చేపలు పడుతూ కాంగ్రెస్​ శ్రేణుల నిరసన

సూర్యాపేట జిల్లాలో ప్రమాదకరంగా మారిన గుంతలను పూడ్చాలని కాంగ్రెస్​ నాయకులు గుంతల్లో గాలాలు వేసి చేపలు పడుతూ నిరసన తెలిపారు. వానాకాలంలో గుంతల్లో నీరు చేరితే పరిస్థితి ఇబ్బందికరంగా మారుతుందని చెబుతూ అధికారులు వెంటనే స్పందించాలని హస్తం నేతలు అధికారులను కోరారు.

సూర్యాపేట జిల్లా కోదాడ- మిర్యాలగూడ రోడ్డు వద్ద ఉన్న ప్రమాదకరమైన గుంతలను పూడ్చాలని కాంగ్రెస్​ పార్టీ నాయకులు డిమాండ్​ చేశారు. స్థానిక శాంతి స్థూపం వద్ద గుంతల్లో గాలాలు వేసి చేపలు పడుతూ నిరసన వ్యక్తం చేశారు. పట్టణంలోని ప్రధాన రహదారులకు వాటర్​ పైప్​లైన్​ వేస్తే శాశ్వత పరిష్కారమవుతుందని.. అలా కాకుండా అధికారులు తాత్కాలిక మరమ్మతులు చేస్తున్నారని కాంగ్రెస్​ జిల్లా నాయకులు అజీజ్​ పాషా అన్నారు. ఈ గుంతల వద్ద పాదచారులకు, వాహనదారులు తీవ్ర ఇబ్బందులు పడుతున్నారన్నారు.

ప్రస్తుతం వానాకాలం ప్రారంభమైనందున.. పైపులైన్ల వాటర్​ లీకేజీతో పాటు వర్షపు నీరు కూడా గుంతల్లో చేరి తీవ్ర ఇబ్బందిగా మారే అవకాశముందని కాంగ్రెస్​ శ్రేణులు అభిప్రాయపడ్డారు. ప్రభుత్వం ఇప్పటికైనా స్పందించి.. ఈ సమస్యపై ప్రత్యేక దృష్టి సారించాలని కోరారు. పట్టణాభివృద్ధి నిధులతో పాటు నూతనంగా వచ్చిన బడ్జెట్​ నిధులను వాడి పనులు త్వరగా పూర్తిచేయాలని కోరారు.

ఇదీ చూడండి:చైనాను ఆర్థికంగా దెబ్బతీసేలా కేంద్రం పావులు!