విద్యార్థులను విచక్షణా రహితంగా కొట్టిన వాచ్మెన్ సిద్దిపేట జిల్లా దౌలతాబాద్లో మహాత్మా జ్యోతిబాపూలే గురుకుల పాఠశాల వాచ్మెన్గా శంభులింగం విధులు నిర్వర్తిస్తున్నాడు. శనివారం రాత్రి మద్యం మత్తులో 120 మంది విద్యార్థులను విచక్షణ రహితంగా కొట్టాడు. ఒక విద్యార్థి వద్ద సెల్ఫోన్ తీసుకున్న శంభులింగం... ఇవ్వమని అడగడంతో వాగ్వాదానికి దిగాడు. ఆ కోపాన్ని మనసులో పెట్టుకున్నాడు. రాత్రి 10 గంటలకు 120మంది విద్యార్థులను బయటికి పిలిచి వరుసలో నిలబెట్టి రాత్రి ఒంటిగంట వరకు విచక్షణ రహితంగా కొట్టాడు.
ఆదివారం విద్యార్థుల తల్లిదండ్రులు రావటంతో అసలు విషయం బయటకు పొక్కింది. పోలీసులకు ఫిర్యాదు చేయటంతో కేసు నమోదు చేశారు. వాచ్మెన్ను వెంటనే విధులనుంచి తొలగించాలని విద్యార్థుల తల్లిదండ్రులు డిమాండ్ చేశారు.
