జహీరాబాద్​ బాద్​ షా బీబీ పాటిల్​

జహీరాబాద్ లోక్​సభ పోరులో తెరాస అభ్యర్థి బీబీ పాటిల్​ విజయం సాధించారు. కాంగ్రెస్​ అభ్యర్థి మదన్​ మోహనరావుపై 4,471 ఓట్ల తేడాతో గెలుపొందారు. తెరాస సంక్షేమ పథకాలను ప్రజల్లోకి బలంగా తీసుకెళ్లడంలో ఆ పార్టీ  నేతలు సఫలీకృతులయ్యారు. తనను నమ్మి గెలిపించిన జహీరాబాద్​ ప్రజలకు రుణపడి ఉంటానని బీబీ పాటిల్​ అన్నారు.

జహీరాబాద్ పార్లమెంట్​లో తెరాస అభ్యర్థి బీబీ పాటిల్​ విజయం సాధించారు. కాంగ్రెస్​ అభ్యర్థి మదన్​ మోహన రావుపై 4,471 ఓట్ల తేడాతో గెలుపొందారు. ఉదయం ఫలితం విడుదలైన మొదటి రౌండు నుంచి ఇదే ఆధిక్యాన్ని కనబరిచారు. వరుసగా రెండోసారి విజయాన్నందించిన జహీరాబాద్​ ప్రజలకు కృతజ్ఞతలు తెలిపారు.

సంక్షేమమే బలంగా

తెరాస ప్రభుత్వం చేపట్టిన సంక్షేమ, అభివృద్ధి కార్యక్రమాలను ప్రజల్లోకి బలంగా తీసుకెళ్లారు బీబీ పాటిల్. అవి కొనసాగాలంటే తెరాస గెలిస్తేనే సాధ్యమన్న వాదనను తెరాస ఎమ్మెల్యేలు బలంగా తీసుకెళ్లగలిగారు. లింగాయత్​ సామాజిక వర్గానికి చెందిన వ్యక్తి కావడం పాటిల్​కు కలిసొచ్చిన మరో అంశం.

పనిచేయని కాంగ్రెస్​ వ్యూహాలు

హస్తం పార్టీ నుంచి పోటీ చేసిన మదన్​ మోహన్​రావు గట్టి పోటీ ఇచ్చినా... ఫలితం లేకపోయింది. ప్రచారంలో వినియోగించిన ఆధునిక సాంకేతిక పరిజ్ఞానం మదన్​ మోహన్​కు మేలు కలిగించలేకపోయింది. మైనార్టీ ఓటు బ్యాంకు, ఉపాధి కల్పనకు చేస్తున్న కార్యక్రమాలు సైతం జహీరాబాద్​ ఓటర్లపై ప్రభావం చూపలేకపోయాయి. 2014 ఎన్నికల్లో భాజపా మద్దతుతో తెదేపా అభ్యర్థిగా పోటీ చేసిన మదన్‌ మోహన్‌రావు అనంతరం కాంగ్రెస్​లో చేరి... పోటీ చేశారు.

పని చేయని మోదీ మానియా

జహీరాబాద్​లో భాజపా తరఫున పోటీ చేసిన లక్ష్మారెడ్డి మోదీ మానియాను నమ్ముకున్నప్పటికీ అది పనిచేయలేదు. ప్రచారంలో ప్రజల మనసు గెలుచుకోవడంలో విఫలమయ్యారు.

ఇదీ చూడండి : తెలంగాణలో గెలిచిన ప్రశ్నించే గొంతుక