సిద్దిపేట జిల్లా గజ్వేల్‌ పట్టణానికి చెందిన కర్రె కిరణ్‌ కుమార్‌ యాదవ్‌, సునీత దంపతులు... సంగారెడ్డి జిల్లా పటాన్‌చెరు మండలంలోని ఇస్నాపూర్‌లో ఉంటున్నారు. కిరణ్‌కుమార్‌ హైదరాబాద్‌లోని ఖజానా కార్యాలయంలో తాత్కాలిక ఉద్యోగి. నెలకు రూ.25 వేల జీతం. వారికి ఐదేళ్ల క్రితం మొదటి పాప ప్రణయ జన్మించింది. 11 నెలల క్రితం రెండో కాన్పులోనూ ఆడపిల్ల పుట్టగా విజయదుర్గగా నామకరణం చేశారు. ముద్దులొలికే ఆ చిన్నారి నెలలు గడుస్తున్నా... బోర్లా పడకపోవడం, మెడ నిలపలేకపోతుండటాన్ని చూసి కంగారుపడ్డారు.
ఏదో సమస్య ఉంటుందనుకుని అన్ని పరీక్షలూ చేయించారు. అరుదైన జన్యు సంబంధ వ్యాధి వల్లనే ఇలా జరుగుతోందని నిర్ధారణ కాగా... హతాశులయ్యారు. ఎంత ఖర్చయినా బిడ్డను కాపాడుకుందామనే అనుకున్నారు. ఈ వ్యాధిని నయం చేసే ఔషధం కోసం రూ.16 కోట్లు వ్యయమవుతుందని తెలుసుకుని ఒక్కసారిగా కుప్పకూలిపోయారు.