మున్సిపల్, ఐటీ శాఖ మంత్రి కేటీఆర్ సహకారంతో కార్మిక క్షేత్రమైన సిరిసిల్లలో నూతన శోభ సంతరించుకోనుంది. పట్టణ శివారులోని కొత్తచెరువు.. పర్యాటక కేంద్రంగా రూపుదిద్దుకుంటోంది. 2015లో రూ. 7.50 కోట్లతో కొత్త చెరువు అభివృద్ధికి స్థానిక ఎమ్మెల్యే, మంత్రి కేటీఆర్ శంకుస్థాపన చేశారు. రెండు కిలోమీటర్ల పొడవున్న చెరువు కట్టను 7 మీటర్లు వెడల్పు చేసి రహదారిని నిర్మించారు.
మొత్తం 74 ఎకరాల కొత్త చెరువు విస్తీర్ణంలో ఇప్పటికే నాలుగు ఎకరాల్లో పార్కును ఏర్పాటు చేశారు. 3.5 ఎకరాల్లో ఐలాండ్ సైతం నిర్మాణంలో ఉంది. ఉదయం పూట వ్యాయామం చేసేందుకు వాకింగ్ ట్రాక్తో పాటు ధ్యాన మందిరాలు, ఓపెన్ జిమ్లు ఏర్పాటు చేస్తున్నారు.