ప్రజా పరిపాలనలో అత్యున్నత ఫలితాలు చూపినందుకు అఖిల భారత సర్వీసు అధికారులకు ప్రధాన మంత్రి ఎక్సలెన్స్ అవార్డులను ఏటా సివిల్ సర్వీసెస్ దినోత్సవం రోజున ఇస్తోంది. అయితే 2020కి గాను ప్రధానమంత్రి అవార్డులకు సంబంధించిన సవరణలపై సలహాలు, సూచనలు ఇవ్వాల్సిందిగా కేంద్ర ప్రభుత్వం దేశవ్యాప్తంగా కేవలం 15 జిల్లాల కలెక్టర్లకు ఆహ్వానం పంపింది. ఈనెల 28న మంగళవారం వీడియో కాన్ఫరెన్స్ ద్వారా సలహాలు సూచనలు ఇవ్వాల్సిందిగా కేంద్ర ప్రభుత్వం కోరింది. దక్షిణ భారతదేశం నుంచి 4 జిల్లాల కలెక్టర్లకు ఆహ్వానం అందింది.
అరుదైన అవకాశం:
తెలంగాణ నుంచి రాజన్న సిరిసిల్ల జిల్లా కలెక్టర్ కృష్ణ భాస్కర్కు ఈ అరుదైన అవకాశం దక్కింది. కొత్త జిల్లాల పరంగా చూసుకుంటే ఈ అవకాశం దక్కించుకున్న ఏకైక జిల్లా రాజన్న సిరిసిల్ల జిల్లా కావడం విశేషం. గ్రామీణాభివృద్ధి, మౌలిక వసతుల కల్పన, విద్యాభివృద్ధికి సంబంధించి ప్రధానమంత్రి అవార్డులలో చేపట్టాల్సిన సవరణలు, సూచనలను పరిపాలన సంస్కరణలు, ప్రజా ఫిర్యాదుల విభాగం కార్యదర్శికి జిల్లా కలెక్టర్ కృష్ణ భాస్కర్.. వీడియో కాన్ఫరెన్స్ ద్వారా తెలియజేశారు.