వ్యవసాయాన్ని పండుగలా చేయాలన్నదే సీఎం కేసీఆర్ లక్ష్యమని మంత్రి కేటీఆర్ పేర్కొన్నారు. సిరిసిల్లలో ఆధునిక రైతుబజార్‌ను ప్రారంభించిన కేటీఆర్... దేశంలో ఎక్కడా లేని విధంగా తెలంగాణలో అద్భుతమైన కార్యక్రమాలు చేపట్టామని తెలిపారు.
అడ్డంకులు అధిగమించి ప్రపంచంలోనే అతిపెద్ద ఎత్తిపోతల పథకం కాళేశ్వరం నిర్మించామని చెప్పారు. గోదాంల సామర్థ్యాన్ని 50 లక్షల మెట్రిక్ టన్నులకు పెంచే దిశగా కేసీఆర్ ఆలోచిస్తున్నారని వెల్లడించారు. కరోనా సంక్షోభంలోనూ రైతుల సంక్షేమాన్ని మరువలేదని స్పష్టం చేశారు. 5.60 లక్షలమంది రైతులకు రుణమాఫీ చేశామని వివరించారు. రైతుబంధు కింద 50 లక్షల మంది రైతుల ఖాతాల్లో రూ.5,200 కోట్లు జమ చేశామని తెలిపారు. కరోనాతో చిరువ్యాపారులు ఇబ్బందిపడుతున్నారన్న కేటీఆర్... రైతుబజార్లో 223 మంది వ్యాపారం చేసుకునేలా దుకాణాలు నిర్మించామని చెప్పారు.
