COVID-19 positive pregnant: కరోనా సోకిన గర్భిణికి పురుడు పోసిన ఎల్లారెడ్డి పేట ప్రాథమిక ఆరోగ్య కేంద్రం వైద్యులను మంత్రులు హరీశ్ రావు, కేటీఆర్ అభినందించారు. రాజన్న సిరిసిల్ల జిల్లా ఎల్లారెడ్డి పేట ప్రాథమిక ఆరోగ్య కేంద్రానికి అత్యవసర పరిస్థితుల్లో ఓ గర్భిణి వచ్చింది. ఆమెకు కరోనా ఉందని తెలుకున్న వైద్యులు.. జాగ్రత్తలు పాటించి కాన్పు చేశారు. తల్లి, బిడ్డ క్షేమంగా ఉండేలా జాగ్రత్తలు తీసుకున్నారు. మెరుగైన వైద్యం కోసం వారిని వెంటనే సిరిసిల్ల జిల్లా ఆస్పత్రికి తరలించారు.
ఈ విషయాన్ని సిరిసిల్ల జిల్లా వైద్యాధికారి ట్విట్టర్‌లో పోస్ట్ చేశారు. ఇది గమనించిన వైద్యారోగ్య శాఖ మంత్రి హరీశ్ రావు... ఇలాంటి మంచి వార్తలు చాలా వినాలని ఆకాంక్షించారు. తల్లీ బిడ్డ క్షేమమన్న వార్త చాలా సంతోషం కలిగించిందని తెలిపారు. కేటీఆర్ సైతం మంచి పనిచేశారంటూ... వైద్యులను అభినందిస్తూ ట్వీట్ చేశారు.