revanth reddy: విద్యార్థి ఉద్యమాల స్ఫూర్తితో సాధించిన రాష్ట్రంలో.. సీఎం కేసీఆర్ విద్యా వ్యవస్థను భ్రష్టు పట్టించారని టీపీసీసీ అధ్యక్షుడు రేవంత్రెడ్డి ఆరోపించారు. బాసర ట్రిపుల్ ఐటీకి వెళ్లిన రేవంత్ను అరెస్ట్ చేసిన పోలీసులు.. లోకేశ్వరం పోలీస్స్టేషన్కు తరలించారు. అనంతరం ఆయనను ఇందల్వాయి టోల్గేట్ వద్ద వదిలిపెట్టారు. ఈ సందర్భంగా రేవంత్ మాట్లాడారు. విద్యార్థుల సమస్యలు తెలుసుకోవడానికి వెళ్తున్న తనను అడ్డుకునేందుకు వేల మంది పోలీసులను బందోబస్తుగా పెట్టిన ప్రభుత్వానికి.. రాష్ట్ర రాజధాని నడిబొడ్డున బాలికలపై అత్యాచారాలు జరుగుతుంటే పట్టించుకోవడం చేతకావడం లేదా అని ప్రశ్నించారు. భారాస ఏర్పాటు కోసం గంటల తరబడి చర్చలు పెట్టే కేసీఆర్కు.. విద్యార్థుల సమస్యలను పట్టించుకోవడానికి సమయం లేకపోవడం సిగ్గుచేటన్నారు. వెంటనే బాసర ట్రిపుల్ ఐటీ విద్యార్థుల సమస్యలను పరిష్కరించాలని డిమాండ్ చేశారు.
ఈ క్రమంలోనే రైతు డిక్లరేషన్ మాదిరిగానే విద్య, నిరుద్యోగంపై కాంగ్రెస్ పార్టీ నిరుద్యోగ డిక్లరేషన్ తీసుకొస్తుందని రేవంత్రెడ్డి ప్రకటించారు. రాబోయే 11 నెలల్లో కాంగ్రెస్ ప్రభుత్వం ఏర్పడటం ఖాయమన్నారు. అధికారంలోకి వచ్చాక.. రాష్ట్రంలో నిరుద్యోగ సమస్యను పరిష్కరిస్తామని తెలిపారు.
వర్సిటీలను నిర్వీర్యం చేస్తూ విద్యావ్యవస్థను కేసీఆర్ భ్రష్టు పట్టిస్తున్నారు. భారాస ఏర్పాటు కోసం గంటల తరబడి చర్చలు పెట్టే కేసీఆర్కు.. విద్యార్థుల సమస్యలను పట్టించుకోవడానికి సమయం లేకపోవడం సిగ్గుచేటు. బాసర విద్యార్థుల సమస్యలపై మంత్రుల బృందం ఏర్పాటు చేయాలి. రైతు డిక్లరేషన్ మాదిరిగా విద్య, నిరుద్యోగంపై డిక్లరేషన్ తీసుకొస్తాం. రాష్ట్రంలో నిరుద్యోగ సమస్య పరిష్కరిస్తాం.- రేవంత్రెడ్డి, టీపీసీసీ అధ్యక్షుడు