శిథిలావస్థలో మునుగోడు పాఠశాల

నిధుల లేమితో శిథిలావస్థకు చేరిన భవనాలు... అరకొర సౌకర్యాలతో విద్యార్థుల అవస్థలు... ఉపాధ్యాయులు లేక కుంటుపడుతున్న చదువులు... విద్యార్థులు లేక మూత పడుతున్న సర్కారు బడులు. ప్రభుత్వ పాఠశాలల గురించి ఇలాంటి సమస్యలు ఎన్నో వినుంటాం. కానీ నిధుల పుష్కలంగా ఉన్నా.. పనులు చేయడానికి టెండర్ల ప్రక్రియ పూర్తి చేసినా... అధికారుల నిర్లక్ష్యం వల్ల పనులు సాగని పాఠశాల ఉందంటే నల్గొండ జిల్లా మునుగోడు జిల్లా పరిషత్​ పాఠశాలేనని చెప్పుకోవచ్చు.

పెచ్చులూడిపోయిన స్లాబులు, నీళ్లు కారుతున్న గోడలు... కూలిపోవడానికి సిద్ధంగా ఉన్న తరగతి గదులు, బిక్కుబిక్కుమంటూ గడుపుతున్న విద్యార్థులు... నల్గొండ జిల్లా మునుగోడు జిల్లా పరిషత్​ పాఠశాలలో దర్శనమిస్తున్నాయి. తరగదుల నిర్మాణం కోసం నిధులు మంజూరైనా... అధికారుల జాప్యం వల్ల పనులు కార్యరూపం దాల్చక 2019-20 విద్యాసంవత్సరంలో కూడా విద్యార్థులకు కష్టాలు తప్పేలా లేవు.

ప్రారంభం కాని పనులు

మునుగోడు పాఠశాలలోని 20 తరగతి గదుల్లో 15 శిథిలావస్థకు చేరాయి. మిగిలిన ఐదు గదులతోనే రోజులు నెట్టుకొస్తున్నారు. పరిస్థితి గమనించిన జిల్లా కలెక్టర్​ గౌరవ్​ ఉప్పల్​ ఆదేశాలతో జిల్లా ఖనిజాభివృద్ధి సంస్థ నిధుల నుంచి రూ.68 లక్షలు, రాష్ట్రీయ మాధ్యమిక శిక్ష అభియాన్​ నిధుల నుంచి మరో రూ. 72 లక్షలు గతేడాదిలోనే మంజూరయ్యాయి. పనులు ప్రారంభానికి గతేడాది డిసెంబరులోనే టెండర్లు నిర్వహించారు. నూతనంగా 14 గదుల నిర్మాణానికి ప్రణాళికలు రూపొందించారు.

ఇబ్బందులు వర్ణణాతీతం

అన్నీ ఉన్నా అల్లుడి నోట్ల శని అన్న చందంగా నిధులున్నా అధికారుల నిర్లక్ష్యం వల్ల పనులు ప్రారంభం కాలేదు. ఇప్పుడు వర్షాకాలం ఎప్పుడు ఏ గది కూలుతుందో... ఏ స్లాబు మీదపడుతుందోనని విద్యార్థులు, ఉపాధ్యాయులు బిక్కుబిక్కుమంటూ గడుపుతున్నారు.

ప్రజాప్రతినిధుల నిరాహారదీక్ష

తరగతి గదుల నిర్మాణం తక్షణమే చేపట్టాలని డిమాండ్​ చేస్తూ స్థానిక ఎంపీటీసీ బొడ్డు శ్రావణి నాగరాజు పాఠశాల ముందు రిలే నిరాహార దీక్ష చేశారు. విద్యార్థుల జీవితాలతో చెలగాటం ఆడకుండా సాధ్యమైనంత త్వరగా పనులు ప్రారంభించాలని స్థానికులు, విద్యార్థి సంఘాల నేతలు డిమాండ్​ చేస్తున్నారు.

ఇదీ చూడండి: 'కార్పొరేట్​కు దీటుగా నాణ్యమైన విద్యే గురుకుల పాఠశాల ఉద్దేశం'