భూ సమస్య పరిష్కరించాలని తహసీల్దార్​ కారు అడ్డగించిన రైతు

భూ సమస్యను పరిష్కరించాలని నాగర్​ కర్నూల్ జిల్లా లింగాల మండల తహసీల్దార్‌ కార్యాలయానికి వెళ్లిన రైతుకు తహసీల్దార్‌ వాహనం తగలటం వల్ల పరిస్థితి ఉద్రిక్తంగా మారింది. భూ సమస్య పరిష్కరించమని వెళితే.. నిర్లక్ష్యంగా వ్యవహరించిన తహసీల్దార్​ తీరుపై సర్వత్రా విమర్శలు వెల్లువెత్తుతున్నాయి.

భూ సమస్య పరిష్కరించాలని వేడుకున్న రైతుతో తహసీల్దార్​ అమానుషంగా ప్రవర్తించిన సంఘటన నాగర్ కర్నూల్ జిల్లా లింగాల మండలం దారారం గ్రామంలో చోటుచేసుకుంది. దారారం గ్రామానికి చెందిన కొండల్ అనే రైతు సర్వే నంబర్ 1067లో ఉన్న తన తండ్రి వెంకటయ్య పేరు మీదున్న 6 ఎకరాల భూమిని తనపేరు మీద పట్టా చేయాలని తహసీల్దార్ మల్లికార్జున్ రావును కోరారు. కొన్ని నెలలుగా ఎమ్మార్వో కార్యాలయం చుట్టూ తిరిగినా.. ఇంత వరకు తన సమస్య పరిష్కరించలేదని రైతు కొండల్ తెలిపారు.

ఈ విషయంపై ఎమ్మార్వో మల్లికార్జున్​ రావును కొండల్ నిలదీయగా.. ఇద్దరి మధ్య వాగ్వాదం చోటు చేసుకుంది. తన సమస్య పరిష్కరించిన తర్వాతే అక్కణ్నుంచి వెళ్లాలని ఎమ్మార్వో కారును అడ్డగించాడు. రైతు గోడును పట్టించుకోని తహసీల్దార్​ కారు పోనివ్వడం వల్ల అడ్డుగా వచ్చిన రైతు కొండల్ వాహనం తగిలి కింద పడిపోయాడు. అది పట్టించుకోకుండా మల్లికార్జున్ రావు అక్కణ్నుంచి వెళ్లిపోయారు.

స్వల్ప గాయాలతో రైతు కొండల్ తహసీల్దార్ కార్యాలయం వల్ల బైఠాయించి నిరసన వ్యక్తం చేశారు. ఈ విషయాన్ని స్థానిక ఎమ్మెల్యే , ప్రభుత్వ విప్ గువ్వల బాలరాజు దృష్టికి తీసుకెళ్లారు. కొండల్ భూమి సమస్యను వెంటనే పరిష్కరించాలని ఎమ్మార్వో మల్లికార్జున రావును ఎమ్మెల్యే ఆదేశించారు. అక్కడికి చేరుకున్న అచ్చంపేట ఆర్డీఓ పాండునాయక్ విచారణ చేపట్టారు.

• ఇదీ చదవండి:ఒకే కుటుంబంలో అయిదుగురు ఆత్మహత్య!