రూ. కోటిన్నరతో చేపడుతున్న పనులకు మంత్రి శంకుస్థాపన

మేడ్చల్​ మల్కాజిగిరి జిల్లా పోచారం పురపాలక పరిధిలో చేపడుతున్న పలు అభివృద్ధి పనులకు జిల్లా కలెక్టర్​ వాసం వెంకటేశ్వర్లుతో కలిసి మంత్రి మల్లారెడ్డి ప్రారంభించారు. ప్రతి ఒక్కరూ ఇంటిని, పరిసరాలను శుభ్రంగా ఉంచుకోవడం వల్ల సీజనల్ వ్యాధుల బారిన పడరని మంత్రి సూచించారు.

పట్టణ, గ్రామాల్లో నివసిస్తున్న ప్రజలు.. సీజనల్​ వ్యాధుల బారిన పడకుండా ఉండాలంటే ఇంటితో పాటు చుట్టు ఉన్న పరిసరాలను పరిశుభ్రంగా ఉంచుకోవాలని మంత్రి మల్లారెడ్డి వెల్లడించారు. మేడ్చల్​ మల్కాజిగిరి జిల్లా పోచారం పురపాలిక పరిధిలోని యంనంపేట, ఆర్జీకే కాలనీలో రూ. కోటిన్నర నిధులతో చేపడుతున్న అభివృద్ధి పనులకు ఆయన శంకుస్థాపన చేశారు.

అనంతరం మిరాలకుంట మినీ ట్యాంక్​బండ్​ నిర్మాణ పనులను కలెక్టర్​ వాసం వెంకటేశ్వర్లు, మున్సిపల్​ ఛైర్మన్​తో కలిసి మంత్రి ప్రారంభించారు. పట్టణ ప్రగతిలో ప్రజాప్రతినిధులు అందరూ పారిశుద్ధ్య కార్యక్రమం చేపట్టి స్థానికుల సమస్యలను పరిష్కరించాలని అధికారులకు మల్లారెడ్డి సూచించారు.