బోడుప్పల్, పీర్జాదిగూడ కార్పొరేషన్లలో కారుదే హవా

రాష్ట్ర వ్యాప్తంగా కార్పొరేషన్లలో కారు జోరు కొనసాగుతోంది. మేడ్చల్ మల్కాజిగిరి జిల్లాలో తెరాస విజయకేతనం ఎగురవేసింది. బోడుప్పల్‌లో 28 స్థానాలకు 14 డివిజన్లలో గెలుపొందగా, పీర్జాదిగూడలో 26 డివిజన్లలో 16 స్థానాల్లో తెరాస గెలిచింది.

తెలంగాణ వ్యాప్తంగా పురపాలికలతో పాటు 9 స్థానాలకు జరిగిన నగరపాలక సంస్థల ఫలితాల్లో తెరాస హవా కనిపిస్తోంది. మేడ్చల్‌ మల్కాజిగిరి జిల్లాలో బోడుప్పల్, పీర్జాదిగూడ నగరపాలికల్లో గులాబీ పార్టీ విజయకేతనం ఎగురవేసింది.

బోడుప్పల్ నగరపాలిక పరిధిలోని 28 డివిజన్లలో తెరాస 14 స్థానాల్లో గెలిచింది. కాంగ్రెస్ 7, భాజపా రెండు, ఐదు స్థానాల్లో స్వతంత్ర అభ్యర్థులు విజయం సాధించారు.

పీర్జాదిగూడ కార్పొరేషన్‌ పరిధిలో 26 డివిజన్లలో 16 స్థానాల్లో తెరాస విజయం సాధించింది. మూడింట కాంగ్రెస్, ఒక స్థానంలో భాజపా, 6 చోట్ల స్వతంత్ర అభ్యర్థులు గెలుపొందారు.

ఆయా కార్పొరేషన్లలో కారు జోరుకు తెరాస శ్రేణులు సంబురాలు చేసుకున్నారు.