రైతుల కష్ట సుఖాలు తెలిసిన వ్యక్తిగా... రైతుని రారాజును చేయాలనే సంకల్పంతో ముఖ్యమంత్రి కేసీఆర్‌ ఉన్నారని పర్యాటక శాఖ మంత్రి శ్రీనివాస్ గౌడ్ అన్నారు. రైతు పండించిన పంట మెుత్తాన్ని గిట్టుబాటు ధర కల్పించి... కొనేందుకు ప్రభుత్వం సిద్ధంగా ఉందని తెలిపారు. వరిధాన్యం కొనుగోలులో రైతులకు ఎలాంటి ఇబ్బంది కలుగకుండా చూడాలని అధికారులను ఆదేశించారు.
ఏ రాష్ట్రంలో లేనివిధంగా ధాన్యం కొనుగోలు కోసం కేసీఆర్‌ రూ.20వేల కోట్ల నిధిని ఏర్పాటు చేశారని తెలిపారు. కరోనా ఉన్నప్పటికీ ధాన్యం కొనుగోలు ఆపలేదని గుర్తు చేశారు. కొనుగోలు కేంద్రాల ఏర్పాటు దేశంలో ఎక్కడా లేదన్నారు. ప్రతి ఊర్లో కొనుగోలు కేంద్రాన్ని ఏర్పాటు చేసి ధాన్యం కొంటామని తెలిపారు. గత సమస్యలు పునరావృతం కాకుండా అధికారులు చర్యలు తీసుకోవాలని అధికారులను ఆదేశించారు.