Tiger wandering Nallamala forest : నల్లమల అటవీ ప్రాంతం హైదరాబాద్, శ్రీశైలం ప్రధాన రహదారిపై పెద్దపులి కలకలం రేపింది. మహబూబ్నగర్ జిల్లా గుండం సమీపంలో మల్లాపూర్ చెంచులకు రోడ్డు దాటుతుండగా పులి కనిపించింది. పులి సంచరిస్తున్న వీడియోను మల్లాపూర్ గ్రామస్థుడు తన సెల్ ఫోన్లో చిత్రీకరించారు.
పాద ముద్రలు గుర్తింపు
పులి సంచారం విషయాన్ని మన్ననూరు రేంజ్ అటవీ అధికారి ఈశ్వర్ ధ్రువీకరించారు. గుండం ప్రాంతంలో పెద్దపులి పాదముద్రలు కనిపించినట్లుగా సిబ్బంది చెప్పారని ఆయన తెలిపారు. హైదరాబాద్కు వెళ్లిన కొంతమంది... రాత్రి స్వగ్రామానికి బస్సులో వస్తుండగా అటవీ ప్రాంతంలో పెద్దపులి రహదారి దాటుతూ కనిపించినట్లుగా తెలుస్తోంది. బస్సులో ప్రయాణించే ఓ వ్యక్తి పెద్దపులి కదలికలను వీడియోలో బంధించారు. ఆ దృశ్యాలు ప్రస్తుతం వైరల్గా మారాయి.
అక్కడ కూడా పెద్దపులి సంచారం
జయశంకర్ భూపాలపల్లి మహముత్తారం మండలం ఉట్లపల్లి గ్రామ సమీపంలో పెద్దపులి సంచారంతో గ్రామస్థులు భయాందోళనకు గురవుతున్నారు. పల్లెప్రకృతి వనంవైపు వెళ్తుండగా పెద్దపులి అడుగులను గుర్తించి అటవీశాఖ అధికారులకు సమాచారం అందించారు. సమాచారం అందుకున్న అజాంనగర్ ఎఫ్ఆర్వో దివ్య సిబ్బందితో పులి సంచరించిన ప్రదేశానికి చేరుకొని అడుగులను పరిశీలించారు.
అప్రమత్తంగా ఉండండి..
పెద్దపులి అడుగులేనని ప్రజలకు ఎఫ్ఆర్వో దివ్య తెలియజేశారు. పొలారం, ఉట్లపల్లి గ్రామాలతో పాటు సమీప గ్రామాల ప్రజలు ఎవరు కూడా అటవీ ప్రాంతంలోకి వెళ్లవద్దని సూచించారు. పశువులను కూడా అడవిలోకి తీసుకెళ్లకూడదని చెప్పారు. పులిని వేటాడేందుకు విద్యుత్ వైర్లు, ఉచ్చులు వంటివి పెడితే చట్టప్రకారం జీవిత ఖైదు తప్పదని హెచ్చరించారు. డీఆర్వో ఆదిల్, బీట్ అధికారి చంద్రశేఖర్పాటు బేస్ క్యాంప్ సిబ్బంది, గ్రామస్థులు పాల్గొన్నారు.
ఇదీ చదవండి:Karnataka bus overturns: నారాయణపేటలో కర్ణాటక బస్సు బోల్తా.. 20 మందికి గాయాలు
