స్థానికేతర ఎంపీటీసీ మాకొద్దు..!

ఏకగ్రవంగా ఎన్నికైన స్థానికేతర ఎంపీటీసీ ఎన్నికను రద్దు చేయాలని మహబూబాబాద్​ జిల్లా రామన్నగూడెంలో గ్రామస్తులు రోడ్డెక్కారు. అధికారులు స్పందించి మళ్లీ ఎన్నికలు నిర్వహించాలంటూ ఆందోళన చేపట్టారు.

స్థానికేతర ఏకగ్రీవ ఎంపీటీసీ ఎన్నికను రద్దు చేయాలని మహబూబాబాద్ జిల్లా నర్సింహులపేట మండలం రామన్న గూడెం గ్రామస్తులు ధర్నాకు దిగారు. ప్రాదేశిక ఎన్నికల్లో భాగంగా ఎంపీటీసీ స్థానానికి 8 మంది అభ్యర్థులు నామ పత్రాలు దాఖలు చేశారు. ఈ నెల 2న జరిగిన నామినేషన్ల ఉపసంహరణలో మిగతా ఏడుగురు అభ్యర్థులు విత్​డ్రా చేసుకున్నారు. పెద్ద నాగారం గ్రామానికి చెందిన అభ్యర్థి ఎంపీటీసీగా ఏకగ్రీవంగా ఎన్నికయ్యారు. స్థానికేతరులు అవసరం లేదని... గ్రామానికి చెందిన వారే ఎంపీటీసీగా ఉండాలని గ్రామస్థులు మూకుమ్మడిగా ధర్నాకు దిగారు. ఆ ఎన్నికను రద్దు చేయాలని గ్రామ రహదారులపై ముళ్లకంపలు వేసి ఆందోళన చేపట్టారు. స్థానికేతరులైన ఎంపీటీసీ దిష్టిబొమ్మను దహనం చేశారు. అధికారులు ఆ ఎన్నికను రద్దు చేసి తిరిగి ఎన్నికలు నిర్వహించాలని రామన్నగూడెం గ్రామస్తులు డిమాండ్ చేశారు.

ఇవీ చూడండి: ప్రస్తుత విధానాల్లో లోపాలున్నాయి... మార్పు అవసరం