ఖమ్మంలో రోడ్లుపై వెళ్లాలంటే భయం... ఎందుకంటే!

Khammam News: ఉమ్మడి ఖమ్మం జిల్లాలోని నగర, పురపాలికల్లో కుక్కలు, కోతుల బెడద అంతకంతకూ పెరుగుతోంది. గుంపులు గుంపులుగా చేరి హంగామా సృష్టిస్తున్నాయి. ఉదయం వేళ కోతులు ఇబ్బందులు పెడుతుంటే... రాత్రి వేళ రోడ్డుపైకి వస్తే కుక్కలు హడలెత్తిస్తున్నాయి. వాహనాలపై వెళ్లే వారి వెంట పడుతున్నాయి.

Khammam News: ఖమ్మం జిల్లాలో కోతులు, కుక్కల బెడద ఎక్కువై పోయింది. కోతులు, కుక్కల సంఖ్య గణనీయంగా పెరిగింది. రహదారిపై వెళ్లే వారిపై వెంటపడి దాడికి పాల్పడుతున్నాయి. గుంపులు గంపులుగా చేరి నానా యాగీ చేస్తున్నాయి. వాటి వల్ల ఇళ్ల నుంచి బయటకు రావాలన్నా భయపడాల్సిన పరిస్థితి. ఒంటరిగా వెళ్లాలంటేనే జనం జంకాల్సి వస్తోంది. కుక్కలు, కోతులు తీవ్రంగా ఇబ్బంది పెడుతున్నట్లు అధికారులకు ఫిర్యాదులు వస్తూనే ఉన్నాయి. వీధుల్లో కుక్కలు, ఇళ్లపై కోతులతో ప్రజలు ఇక్కట్లు పడుతున్నారు.

పట్టించుకోని అధికారులు: ఖమ్మం నగరపాలికతో పాటు వైరా, మధిర, సత్తుపల్లి, కొత్తగూడెం, ఇల్లందు, మణుగూరు పట్టణాల్లో కుక్కలు, కోతుల బెడద ఎక్కువగా ఉంది. ఇతర ప్రాంతాల్లో పట్టుకున్న కుక్కలను... ఖమ్మంలోని పలు ప్రాంతాల్లో వదిలి వేస్తున్నట్లు స్థానికులు వాపోతున్నారు. మూడేళ్లుగా గణనీయంగా పెరిగిన వాటి సంఖ్యతో తీవ్ర ఇబ్బంది పడుతున్నామని ఆవేదన వ్యక్తం చేస్తున్నారు. అధికారులకు ఎన్నిసార్లు ఫిర్యాదు చేసినా పట్టించుకోవడంలేదని వాపోతున్నారు.

దాడులు: వీధి కుక్కలను పట్టుకుని వాటి సంతానం పెరగకుండా శస్త్రచికిత్స నిర్వహించాల్సి ఉన్నా... ఆ దిశగా అధికారులు ఎలాంటి చర్యలు తీసుకోవడం లేదని స్థానికులు అంటున్నారు. ఖమ్మం నగరంలో దాదాపు 3 వేలవరకు కుక్కలు స్వైరవిహారం చేస్తున్నాయి. శివారు కాలనీలే కాదు నగర నడిబొడ్డున ప్రాంతాల్లోనూ సంచరిస్తున్నాయి. కనపడ్డ వారిపై దాడులు చేస్తున్నాయి.

ఖమ్మంలో ఇటీవల ఇద్దరు హాస్టల్ విద్యార్థులు సహా పలువురు మహిళలపై కుక్కలు దాడిచేశాయి. మధిరలో ఒకేసారి 15 మందిపై కుక్కలు దాడి చేసి గాయపరిచాయి. ఇల్లందులో 6 నెలల క్రితం కాకతీయ నగర్‌లో 10 మందిపై దాడి చేశాయని స్థానికులు చెబుతున్నారు. సమస్యలను గుర్తించి అధికారులు పరిష్కారం చూపాలని స్థానికులు కోరుతున్నారు. కుక్కలు, కోతుల నుంచి రక్షణ కల్పించాలని అడుగుతున్నారు..

ఇదీ చదవండి :