Khammam District Rain News : ఉమ్మడి ఖమ్మం జిల్లాల్లో వరుణుడి ఉగ్రరూపం.. పొంగిపొర్లుతున్న వాగులు

Rain In Khammam District : ఎడతెరిపిలేకుండా కురుస్తున్న భారీ వర్షాలతో ఉమ్మడి ఖమ్మం జిల్లా తడిసి ముద్దవుతోంది. ఖమ్మం, భద్రాద్రి కొత్తగూడెం జిల్లాల్లో వరుణుడి జోరు కొనసాగుతోంది. ఖమ్మంలోని మున్నేరుకు వరద ఉద్ధృతి పెరుగుతోంది. భద్రాచలం వద్ద గోదావరి నీటిమట్టం మళ్లీ పెరుగుతోంది. బుధవారం సాయంత్రానికి 46 అడుగులు దాటి ప్రవహిస్తుంది. మరోసారి మొదటి ప్రమాద హెచ్చరిక కొనసాగుతోంది. రెండు రోజుల పాటు తెరిపిలేకుండా కురుస్తున్న వర్షాలకు తోడు ఎగువ ప్రాంతాల నుంచి భారీగా వచ్చి చేరుతున్న వరద ప్రవాహంతో సాగునీటి ప్రాజెక్టులు, ప్రధాన జలాశయాలకు వరద పోటెత్తుతోంది.

Heavy Rain In Khammam District : ఎడతెరిపి లేకుండాకురుస్తన్న భారీ వర్షాలతో ఉమ్మడి ఖమ్మం జిల్లాలో జనజీవనం స్తంభించింది. వాగులు వంకలు పొంగిపొర్లుతున్నాయి. ప్రధాన జలాశయాలు, సాగునీటి ప్రాజెక్టులకు వరద క్రమంగా పెరుగుతుండటంతో పరవళ్లు తొక్కుతున్నాయి. వారం రోజుల క్రితం వెలవెలబోయిన పాలేరు జలాశయం.. ప్రస్తుతం పరవళ్లు తొక్కుతోంది. ఎగువ ప్రాంతాలైన సూర్యాపేట, వరంగల్, మహబూబాబ్ జిల్లాల్లో కురుస్తున్న వర్షాలతో భారీగా వరద నీరు వచ్చిచేరుతుండటంతో.. పాలేరు జలాశయం పొంగి ప్రవహిస్తోంది. రిజర్వాయర్ 24 గేట్లు ఎత్తి సుమారు 10 వేల క్యూసెక్కుల వరద నీరు దిగువకు ప్రవహిస్తున్నాయి.

వైరా రిజర్వాయర్ మత్తడి దూకుతోంది. భారీగా వచ్చి చేరుతున్న వరద ప్రవాహంతో పూర్తిస్థాయిలో నిండింది. పూర్తిస్థాయి నీటి మట్టం 18.3 అడుగులు కాగా.. ఇప్పటికే 19 అడుగులు దాటి ఉద్ధృతంగా అలుగులు పారుతున్నాయి. రిజర్వాయర్ ఎగువ ప్రాంతాల నుంచి భారీగా వస్తున్న వరద నీటితో రిజర్వాయర్ మత్తడి దూకుతోంది. అలుగులు పారుతున్నాయి. సత్తుపల్లి మండలంలోని బేతుపల్లి పెద్దచెరువు పూర్తిస్థాయి నీటి మట్టాన్ని దాటి అలుగు పారుతోంది.

కిన్నెరసాని ప్రాజెక్టుకు జలకళ : భద్రాద్రి కొత్తగూడెం జిల్లాలోని జలాశయాలు జలకళ సంతరించుకున్నాయి. పాల్వంచ మండలంలోని కిన్నెరసాని జలాశయానికి వరద పోటెత్తుతోంది. జలాశయం పూర్తిస్థాయి నీటి మట్టం 407 అడుగులు కాగా.. ప్రస్తుత నీటి మట్టం 403.20 అడుగులకు చేరింది. ఇన్ ఫ్లో 56,000 క్యూసెక్కులు ఉంది. 5 గేట్లు ఎత్తి 29,000 క్యూసెక్కులు దిగువకు విడుదల చేశారు. వరద ఉద్ధృతి మరింత పెరిగే అవకాశం ఉందని అధికారులు భావిస్తున్నారు.

Heavy Rain Across Khammam District : ఛత్తీస్​గఢ్​లో కురుస్తున్న భారీ వర్షాలకు తోడు ఎగువ ప్రాంతాల్లో కురుస్తున్న వర్షాలతో తాలిపేరు ఉప్పొంగుతోంది. 1,98,592 క్యూసెక్కుల వరద నీటిని దిగువ గోదావరికి విడుదల చేస్తున్నారు. పగిడివాగు వంతెన వరద నీటిలో మునిగిపోయింది. అశ్వారావుపేట మండలంలోని పెద్దవాగులో నీటిని 2,792 క్యూసెక్కుల నీటిని దిగువకు విడుదల చేస్తున్నారు. అశ్వారావుపేట మండలంలోని వెంకమ్మ చెరువు మత్తడి దూకుతోంది. ముల్కలపల్లి మండలం మూకమామిడి ప్రాజెక్టు గరిష్ఠ నీటి మట్టానికి చేరుకుంది.

ఉమ్మడి ఖమ్మం జిల్లాల్లో నిండిన చెరువులు : భారీ వర్షాలతో ఉభయ జిల్లాల్లోని చెరువులు, చిన్నతరహా ప్రాజెక్టులు జలకళతో కళకళలాడుతున్నాయి. ఖమ్మం జిల్లాలోని తటాకాలు క్రమంగా నిండుకుండల్లా మారుతున్నాయి. జిల్లాలో మొత్తం 1409 చెరువులకు గానూ ఇప్పటికే 400 చెరువులు పూర్తిగా నిండి తొణికిసలాడుతున్నాయి. దాదాపు 500 చెరువులకు భారీగా వరద ప్రవాహం వచ్చి చేరుతుండటంతో ఒకటి రెండు రోజుల్లో అలుగు పారనున్నాయి. భద్రాద్రి కొత్తగూడెం జిల్లాలో 2363 చెరువులు, చిన్ననీటి వనరులు ఉన్నాయి. వీటిలో భారీ వర్షాలకు దాదాపు 1000 చెరువులు మత్తడి పోస్తున్నాయి. మిగిలిన చెరువులకు వరద ప్రవాహం అంతకంతకూ పెరుగుతుండటంతో జలకళను సంతరించుకున్నాయి.

ఇవీ చదవండి :