సింగరేణి గనుల్లో బొగ్గు గుట్టలు... రవాణాకు తెరుచుకోని దారులు

పారిశ్రమిక రంగాలను కుదేలు చేసిన కరోనా మహమ్మారి.. సింగరేణి పైనా తీవ్ర ప్రభావమే చూపింది. నిత్యం బొగ్గు ఉత్పత్తి... రవాణాతో కళకళలాడే సింగరేణి ప్రాంతాలు.. ఇప్పుడు సందడి లేక వెలవెలబోతున్నాయి. ఓ వైపు కరోనా ప్రభావం... మరోవైపు విద్యుత్ ఉత్పత్తి తగ్గిపోవటం వల్ల సింగరేణి ప్రాంతాల్లో భారీగా బొగ్గు నిల్వలు పేరుకుపోయాయి. గుట్టలుగా పేరుకుపోయిన వెయ్యికోట్ల బొగ్గును కాపాడటం సంస్థకు సైతం భారంగా మారుతోంది.

కరోనాకు ముందు సింగరేణిలో బొగ్గు వెలికితీత ఎంత వేగంగా సాగేదో... ఉత్పత్తి అయిన బొగ్గుకు అంతే డిమాండ్ ఉండేది. ఇలా తీసిన వెంటనే అలా రవాణా అయ్యేది. ఖమ్మం జిల్లాలోని సింగరేణి వ్యాప్తంగా రోజుకు లక్షా 80 వేల టన్నుల నుంచి 2 లక్షల టన్నుల బొగ్గు ఉత్పత్తి అయ్యేది. సింగరేణిలో ఉత్పత్తి అయిన దాదాపు 85 శాతం బొగ్గు... విద్యుత్ ప్లాంట్లకు సరఫరా అవుతుంది. కేటీపీఎస్, వీటీపీఎస్, ఎస్టీపీపీ, కేటీపీపీ, రామగుండం థర్మల్ పవర్ స్టేషన్, వెల్లూర్ థర్మల్ పవర్ స్టేషన్ తదితర విద్యుత్ ఉత్పత్తి కేంద్రాలకు సింగరేణి బొగ్గును సరఫరా చేస్తుంది.

గనుల్లో పేరుకుపోయిన బొగ్గు...

లాక్​డౌన్ నేపథ్యంలో విద్యుత్ ఉత్పత్తి పరిశ్రమలన్నీ కుంటుపడ్డాయి. పరిశ్రమలు మూతపడటం వల్ల అన్ని విద్యుత్ ఉత్పత్తి కేంద్రాలు ఒకటి నుంచి మూడు యూనిట్ల ఉత్పత్తిని నిలిపివేశాయి. ఈ క్రమంలో బొగ్గుకు డిమాండ్ బాగా తగ్గింది. విద్యుత్​కు డిమాండ్ లేకపోవడం, ఫలితంగా బొగ్గుకు డిమాండ్​ తగ్గిపోవటం వల్ల సింగరేణి ఏరియాల్లో బొగ్గు ఎక్కడికక్కడ పేరుకుపోయింది.

కాపాడుకోవటం కూడా భారమే...

విలువైన బొగ్గు సకాలానికి సద్వినియోగపడక పోతుండటం వల్ల సింగరేణి కొంత క్లిష్ట పరిస్థితుల్నేఎదుర్కొంటోంది. నిల్వచేసిన బొగ్గును కాపాడుకోవడం కూడా భారంగానే పరిణమిస్తోంది. బొగ్గును ఎక్కువ కాలం నిల్వచేయటం వల్ల ఉష్ణోత్పత్తి శక్తి తగ్గిపోతుంది. ఫలితంగా రేటు కూడా తగ్గుతోంది. బొగ్గు గాలిలో కలిసినప్పుడు మండే స్వభావం ఏర్పడుతుంది. అక్కడక్కడా ఇలాంటి ప్రమాదాలు కూడా జరిగాయి. బొగ్గు కాలిపోకుండ స్ర్పింక్లర్లతో జాగ్రత్తలు తీసుకుంటున్నారు.

సంస్థకు భారీ నష్టమే...

ఆరుబయట వేసిన బొగ్గు చౌర్యానికి గురయ్యే అవకాశం ఉన్నందున భద్రత కల్పించడం కూడా సింగరేణికి అదనపు భారమే. అన్ని ఏరియాల్లో కలిపి 43 లక్షల 26 వేల 915 టన్నుల బొగ్గు నిల్వలు పేరుకుపోవడం ఆర్థికంగా ఇబ్బందేనని యాజమాన్యం భావిస్తోంది. బొగ్గు నాణ్యతను బట్టి టన్నుకు రూ.1800 నుంచి 4 వేల వరకు ధర పలుకుతుంది. సగటున ఒక్కో టన్నుకు కనీసం రూ. 2 వేల 400 చొప్పున ధర అనుకున్నా.. 1,038 కోట్ల విలువైన బొగ్గు నిల్వలు ఉండటం భారీ నష్టమేనని యాజమాన్యం తెలిపింది.

రవాణా పెరిగితేనే నిల్వలు తగ్గుతాయి...

ఈ ఏడాది వార్షిక బొగ్గు ఉత్పత్తి లక్ష్యం మందకొడిగానే ప్రారంభమైంది. ఏప్రిల్, మే, జూన్ , జూలై నెలలో సింగరేణి వ్యాప్తంగా ఏ ఏరియా నుంచి కూడా 100 శాతం బొగ్గు ఉత్పత్తి జరగలేదు. అయితే 80 వేల టన్నుల రవాణా నుంచి ప్రస్తుతం రోజుకు లక్షా 20 వేల టన్నుల బొగ్గు రవాణా చేసే పరిస్థితికి చేరుకోవడం సింగరేణికి కొంత ఆశాజనకమని యాజమాన్యం భావిస్తుంది. కానీ గణనీయంగా రవాణా పెరిగితేనే బొగ్గు నిల్వలు తగ్గే అవకాశం ఉందంటున్నారు అధికారులు.

లాక్​డౌన్ సడలింపుల తర్వాత ఇటీవల క్రమంగా బొగ్గు డిమాండ్ పెరుగుతుండటం, తటస్థ పరిస్థితుల నుంచి కోలుకోవడం వంటి పరిణామాలు మళ్లీ ఆశలు రేపుతున్నాయి.

ఇదీ చదవండిఃకొవిడ్‌ బాధితులకు పరీక్షల నుంచి చికిత్సల వరకు అడ్డంకులే