కరీంనగర్‌లో డయల్‌-100కు పెరుగుతున్న ఫిర్యాదులు

ఆపత్కాలం, అత్యవసరం ఇలా సందర్భమేదైనా మనకు వెంటనే గుర్తొచ్చే నంబరు డయల్‌-100. పోలీసుల తక్షణ సేవలకు చిరునామాగా మారుతున్న ఈ సహాయ కేంద్రానికి ఇటీవల కాలంలో ఫిర్యాదులు గణనీయంగా పెరుగుతున్నాయి.

లాక్‌డౌన్‌ ఆంక్షల సడలింపు తరువాత మళ్లీ నేరాల కదలిక విషయంలో విరివిగా ఫోన్‌ కాల్స్‌ చేసేవారి సంఖ్య రోజుకింతగా అధికమవుతున్నాయి. ఇక సమాచారం అందిన వెంటనే కరీంనగర్‌ కమిషనరేట్‌ పోలీసులు స్పందిస్తున్నారు. నిర్ణీత వ్యవధిలో బాధితుల చెంతకు చేరుతున్నారు. వారి సమస్య స్థాయిని బట్టి అవసరమైన చర్యల్ని తీసుకుంటున్నారు. ఇలా ఈ ఏడాది మార్చి నెల నుంచి ఈ నెల 20 వరకు జిల్లా వ్యాప్తంగా అన్ని రకాల ఫోన్లు కలిపి రూ. 15వేలను దాటడం ఆపత్కాలంలో అండగా నిలబడమనే తీరుని కళ్లకు కడుతోంది.

సగటున రోజుకు.. 106 కాల్స్‌..

వివిధ సంబంధిత సమస్యలు, గొడవలు, ఇబ్బందుల కోసం జిల్లా వ్యాప్తంగా రోజుకు సగటున 106 మంది డయల్‌-100కు ఫోన్‌ చేస్తున్నట్లు గణాంకాలు స్పష్టం చేస్తున్నాయి. ఇందులో అత్యధికంగా ఇతర సమస్యలు ఉంటున్నప్పటికీ ప్రధానంగా మహిళలకు సంబంధించి గృహ హింసలు, ఇతర అఘాయిత్యాలపైనే ఫిర్యాదులందుతున్నాయి. గడిచిన ఐదు నెలల కాలంలో స్త్రీలపై అఘాయిత్యాల కోసం 1116 ఫోన్‌లు రాగా ఇందులో తొమ్మిది కేసుల్ని పోలీసులు నమోదు చేశారు. కేసుల సంఖ్య తక్కువగా ఉన్నప్పటికీ ఫోన్‌ వచ్చిన వెంటనే స్పందిస్తూ వారికి అవసరమైన సహకారాన్ని, సలహాల్ని మహిళా పోలీసులు అందిస్తున్నారు. ఎక్కువగా కౌన్సెలింగ్‌ల ద్వారా వివాదాల్ని సద్దుమణిగేలా తోడ్పాటునిస్తున్నారు.

ఫిర్యాదుల రకాలు

ఇక షీ బృందంలోని మహిళా పోలీసులు ఇలాంటి వాటి విషయంలో తమ సహకారాన్ని అందించడంతోపాటు మహిళా పోలీస్‌స్టేషన్‌ ద్వారా గొడవల్ని రూపుమాపే ప్రయత్నాల్ని చేస్తున్నారు. ఇందుకోసం భార్యభర్తలకు అవసరమైన సలహాల్ని సూచనల్ని కౌన్సెలింగ్‌ రూపంలో అందిస్తున్నారు. రోడ్డు ప్రమాదాలు సహా ఇతరత్రా విషయాల్ని పలువురు పోలీసులకు తెలియజేస్తున్నారు. ఇక రోజూ వారీగా వస్తున్న ఫోన్‌కాల్స్‌లో కొన్ని తప్పుడు సమాచారంతో కూడిన సమాచారం కూడా అందుతుండటం పోలీసులకు ఇబ్బందిని కలిగిస్తోంది.

నెలల వారిగా ఫిర్యాదులు

ప్రత్యేక చొరవ..

కరీంనగర్‌ కమిషనరేట్‌ పరిధిలో డయల్‌-100 విషయంలో పోలీసులు తక్షణమే స్పందించేలా అవసరమైన వ్యవస్థను ఏర్పాటు చేసుకున్నారు. ఇందుకోసం ప్రతి ఠాణా పరిధిలో ప్రత్యేక పోలీసుల్ని అందుబాటులో ఉంచేలా ఉన్నతాధికారులు చర్యల్ని తీసుకున్నారు. కాల్‌సెంటర్‌ నుంచి సమాచారం రాగానే వీలైనంత తొందరగా సంఘటనా స్థలానికి వెళ్లేలా చొరవ చూపుతున్నారు. ఇలా తక్షణ స్పందనలతో పలువురి ప్రాణాలు కాపాడటంతోపాటు పెద గొడవలు జరగకుండా వివాదాల్ని సమసిపోయేలా చేసిన ఉదంతాలు అధికంగా ఉంటున్నాయి. ఇక ప్రత్యేకించి రోడ్డు ప్రమాదాల సమయంలో మాత్రం వేగంగా స్పందిస్తూ క్షతగాత్రుల్ని ఆస్పత్రికి చేర్చేలా చేస్తుండటంతో గాయపడిన వారి ప్రాణాలు కాపాడేందుకు ఈ తరహా సాయం ఉపయోగపడుతోంది. పెరుగుతున్న నేరాల తీరుకు తగినట్టుగా పోలీసులు స్పందించే విషయంలో వేగాన్ని పెంచుతుండటంతో మంచి మార్పు కనిపిస్తోంది.

ప్రతి ఫిర్యాదుపై స్పందిస్తాం

డయల్‌-100కు వచ్చే ఫిర్యాదులపై స్పందించి సమస్య పరిష్కారానికి ప్రాధాన్యం ఇస్తాం. 100 నెంబర్‌కు ఫిర్యాదు వచ్చిన క్షణాల్లో బాధితుల చెంతకు చేరుకొని పూర్తి స్థాయి విచారణ చేపట్టి న్యాయం చేస్తాం. అత్యవసర ఫిర్యాదుల కోసం ఏర్పాటు చేసిన ఈ సేవలు ప్రతి ఒక్కరు సద్వినియోగం చేసుకోని, నేర రహిత జిల్లాగా నిలిచేందుకు ప్రతి ఒక్కరం కృషి చేయాల్సిన అవసరం ఉంది.

- వి.బి.కమలాసన్‌రెడ్డి, సీపీ కరీంనగర్‌

ఇదీ చదవండి:ఏ చావైనా.. కొవిడ్​ చావుగా భావించడం సరికాదు: మంత్రి ఈటల