కరీంనగర్​ జిల్లాలో పెరిగిన ఆక్సిజన్​ వినియోగం

కరోనా రెండో దశలో తీవ్ర ప్రభావం చూపుతోంది. ఎక్కువశాతం మంది ఆస్పత్రి పాలవుతుండడంతో.... ప్రాణవాయువుకు అనూహ్యంగా డిమాండ్‌ పెరిగింది. గతంతో పోలిస్తే ఆక్సిజన్ సిలిండర్ల వినియోగం... ఐదింతలు పెరగడంతో కరీంనగర్‌ అధికారులు ప్రత్యేకదృష్టి సారించారు. ఇప్పటికే రెండు ఫిల్లింగ్ కేంద్రాల ద్వారా ఆక్సిజన్‌ సరఫరా చేస్తుండగా... డిమాండ్ మరింత పెరగడంతో మరో ఫిల్లింగ్ కేంద్రం ప్రారంభించనున్నారు.

కరోనా తీవ్రమై ఆస్పత్రిలో చేరేవారి సంఖ్య పెరగడంతో ఆక్సిజన్‌ అవసరం పడుతోంది. కరీంనగర్‌ జిల్లాలో ఆస్పత్రులకు ఆక్సిజన్‌ సరఫరాకు అంతరాయం కలగకుండా ఉండేలా అధికారులు ప్రత్యేక చర్యలు తీసుకుంటున్నారు. పరిశ్రమలకు సరఫరా పూర్తిగా నిలిపివేసి ఆ సిలిండర్లను ఆసుపత్రులకు మళ్లిస్తున్నారు. కరీంనగర్‌ జిల్లాతోపాటు రాజన్నసిరిసిల్ల, జగిత్యాల జిల్లాలోని ఆస్పత్రులకు ఇక్కడి నుంచి ఆక్సిజన్ సరఫరా అవుతోంది.

డిమాండ్ పెరుగుతుంది

గతంలో రోజుకు మూడు జిల్లాలకు కలుపుకొని 200నుంచి 300 ఆక్సిజన్‌ సిలిండర్లు విక్రయించేవారు. ప్రస్తుతం ఒక్క కరీంనగర్‌ జిల్లాలోనే 1,500కుపైగా సిలిండర్లు సరఫరా చేయాల్సిన పరిస్థితి ఏర్పడింది. ప్రస్తుతం రోజురోజుకు ఆక్సిజన్ డిమాండ్ పెరుగుతోందని ఆస్పత్రుల నిర్వాహకులు చెబుతున్నారు.

రోజుకు 1,500 సిలిండర్లు

ఇప్పటికే రెండు ఫిల్లింగ్ కేంద్రాల ద్వారా ఆక్సిజన్ సరఫరా అవుతుండగా... మరో కేంద్రాన్ని త్వరలో అందుబాటులోకి తీసుకురానున్నారు. గత నెల 27 వరకు రోజుకు 500 సిలిండర్లు వినియోగంలో ఉండేది. ప్రస్తుతం రోజుకు 1,500 సిలిండర్లు ఫిల్లింగ్ కేంద్రాల ద్వారా సరఫరా చేయగలుగుతున్నామని అధికారులు తెలిపారు. కరీంనగర్‌ జిల్లాలోని అన్ని ఆస్పత్రులకు ఆక్సిజన్‌ అందిస్తున్నామని పేర్కొన్నారు.

ఇదీ చదవండి:కొలువుదీరిన పురపాలక నూతన పాలకవర్గాలు