రాష్ట్రంలో హుజూరాబాద్ మినహా 118 నియోజకవర్గాల్లో దళితబంధు పథకం అమలుకు లబ్ధిదారుల జాబితాలు సిద్ధమవుతున్నాయి. నియోజకవర్గానికి వంద మంది చొప్పున అర్హులను ఎంపిక చేయాలని నిర్ణయించిన ప్రభుత్వం, ఆ బాధ్యతను ఎమ్మెల్యేలకు అప్పగించింది. క్షేత్రస్థాయిలో ఆశావహ ఎస్సీ కుటుంబాలు ఎమ్మెల్యేలకు దరఖాస్తులు సమర్పించాయి. ఎంపికకు స్పష్టమైన నిబంధనలు లేకపోవడంతో ప్రజాప్రతినిధులు తమ విచక్షణ మేరకు ఎంపిక చేస్తున్నారు. దీంతో ఇష్టానుసారంగా ఎంపికలు జరుగుతున్నాయన్న ఆరోపణలూ వస్తున్నాయి. ఇప్పటికే కొన్ని నియోజకవర్గాల జాబితాలు ప్రభుత్వానికి అందగా, ఈ నెల 25 నాటికి మిగతావి చేరనున్నట్లు సమాచారం. మార్చి నెలాఖరు నాటికి ఆయా లబ్ధిదారులు యూనిట్లు స్థాపించేలా చర్యలు చేపట్టాలని ప్రభుత్వం భావిస్తోంది.
దళితబంధు పథకం కింద ఎస్సీ కుటుంబాలకు రూ.10 లక్షల విలువైన స్వయం ఉపాధి యూనిట్లను ప్రభుత్వం మంజూరు చేస్తున్న విషయం తెలిసిందే. పైలెట్‌ ప్రాజెక్టుగా చేపట్టిన హుజూరాబాద్ నియోజకవర్గంలో 20 వేల కుటుంబాలు, సీఎం దత్తత గ్రామం వాసాలమర్రిలో 70 కుటుంబాలకు పథకం మంజూరైంది. హుజూరాబాద్‌లో 1250 కుటుంబాలు, వాసాలమర్రిలో 60 కుటుంబాల యూనిట్లు ఇప్పటికే ప్రారంభమయ్యాయి. వీటితోపాటు చింతకాని (మధిర నియోజకవర్గం, ఖమ్మం జిల్లా), తిరుమలగిరి (తుంగతుర్తి, సూర్యాపేట), చారకొండ (అచ్చంపేట, నాగర్‌కర్నూల్‌), నిజాంసాగర్‌ (జుక్కల్‌, కామారెడ్డి) మండలాల్లో పథకం అమలుకు ప్రభుత్వం రూ.250 కోట్లు విడుదల చేసింది.
జాబితాలపై గోప్యత...
118 నియోజకవర్గాల్లో లబ్ధిదారుల ఎంపిక పూర్తయినప్పటికీ.. జాబితాలో లేని ఇతర ఆశావహ కుటుంబాల నుంచి వ్యతిరేకత వస్తుందన్న కారణంతో ప్రస్తుతం గోప్యత పాటిస్తున్నారు. ఎంపిక ప్రక్రియ పూర్తికాలేదని చెబుతున్నారు. ఎమ్మెల్యేలు.. నియోజకవర్గాల్లో తమ అనుచరులను, అనుకూలంగా ఉన్నవారిని ఎంపిక చేస్తున్నట్లు ఆరోపణలు వస్తున్నాయి. కొన్నిచోట్ల నేతల అనుచరులు.. ఎంపిక చేసిన లబ్ధిదారులతో వాటాలు (రూ.2-4 లక్షలు) మాట్లాడుకుంటున్నారన్న విమర్శలూ ఉన్నాయి.