'ఎవరెస్టు అధిరోహించడమే నా లక్ష్యం'

ఒకవైపు ఉద్యోగం చేస్తూనే మరోవైపు ఎవరెస్టు ఎక్కాలన్న పట్టుదలతో ముందుకు సాగుతున్నాడో కానిస్టేబుల్‌. ఇప్పటికే కిలిమంజారో అధిరోహించాడు. ఆర్థిక ఇబ్బందులున్నా... తోటి ఉద్యోగుల సహకారంతో తన కళను నిజం చేసుకునే దిశగా పయనిస్తున్నాడు.

కరీంనగర్‌‌ ఎక్సైజ్‌ అండ్ ప్రొహిబిషన్ టాస్క్‌ఫోర్స్‌లో కానిస్టేబుల్‌గా పనిచేస్తున్నాడు మహిపాల్ రెడ్డి. గతంలో రక్షణశాఖలో పని చేసిన అతను... గాయాల కారణంగా ఆ ఉద్యోగాన్ని విరమించుకున్నాడు. తర్వాత ఎక్సైజ్ అండ్ ప్రొహిబిషన్‌ శాఖలో ఉద్యోగం వచ్చింది. రక్షణశాఖలో పని చేసినప్పుడే మహిపాల్ రెడ్డికి ఎవరెస్టు ఎక్కాలన్న ఆకాంక్ష మొదలైంది. ఆర్థిక పరిస్థితులు బాగాలేకపోయినప్పటికీ... సహోద్యోగుల సహకారంతో తన ప్రయత్నాన్ని కొసాగించాడు. అరుణాచల్ ప్రదేశ్‌లోని పర్వతారోహణ శిక్షణ కేంద్రంలో దాదాపు నెల రోజుల పాటు శిక్షణ పొందాడు. సుమారు 5898 మీటర్ల ఎత్తులో ఉన్న కిలిమంజారో పర్వతాన్ని విజయవంతంగా అధిరోహించగలిగాడు. 2020లో ఎవరెస్టు ఎక్కాలని నిర్ణయించుకున్నాడు.

ఓ వైపు తాను శారీరకంగా సిద్ధమవుతూనే మరో వైపు పోలీసు ఉద్యోగాల కోసం సన్నద్ధమవుతున్న యువతకు ఉచితంగా శిక్షణనిస్తున్నాడు. కేవలం విజయం సాధించడమే కాకుండా అపజయం నుంచి గెలుపు వైపు ఎలా పయనించాలో బోధిస్తున్నాడు.

ఆర్థిక పరిస్థితులు బాగాలేని వారికి ఉచితంగా శిక్షణనివ్వడం పట్ల యువకుల్లో సంతృప్తి వ్యక్తమవుతోంది. కేవలం శిక్షణే కాకుండా మహిపాల్ రెడ్డిలో ఉన్న పట్టుదల తమలో కూడా ఎంతో స్ఫూర్తిని కలిగిస్తోందని చెబుతున్నారు.ఆయన దగ్గర శిక్షణ పొందిన వారు పలు ఉద్యోగాలు సాధించినట్లు వెల్లడించారు. ఎవరెస్టు అధిరోహించాలన్న మహిపాల్​ రెడ్డి లక్ష్యం నెరవేరాలని కోరకుంటున్నట్లు చెప్పారు.

మనదేశం నుంచి 2020లో ఎవరెస్టు అధిరోహణకు 12మంది ఎంపిక కాగా అందులో మహిపాల్‌ కూడా ఉండటం హర్షణీయం. ఎలాగైనా సరే తన కళని సాకారం చేసుకోవాలని పట్టుదలగా ముందుకు సాగుతున్న మహిపాల్ రెడ్డి ఎవరెస్ట్ ఎక్కాలని మనమూ కోరుకుందాం.

ఇవీ చూడండి: విలీనంపై కొనసాగుతోన్న కాంగ్రెస్​ దీక్ష