లారీని ఢీకొట్టిన కారు.. ఇద్దరు మృతి

అతివేగంతో దూసుకొచ్చిన ఓ కారు ముందు వెళ్తున్న లారీని ఢీకొట్టింది. ప్రమాదంలో ఇద్దరు అక్కడికక్కడే మృతి చెందగా.. మరో ఇద్దరికి తీవ్ర గాయాలయ్యాయి. ఈ ఘటన కరీంనగర్​ జిల్లాలో చోటుచేసుకుంది.

కరీంనగర్ జిల్లా తిమ్మాపూర్ మండలంలోని రామకృష్ణ కాలనీ రాజీవ్ రహదారి వద్ద ఘోర రోడ్డు ప్రమాదం జరిగింది. కరీంనగర్ వైపు నుంచి హైదరాబాద్ వైపు అతివేగంతో దూసుకొచ్చిన ఓ కారు ముందు వెళ్తున్న లారీని ఢీకొట్టింది. ప్రమాదంలో కారులో ఉన్న ఇద్దరు అక్కడికక్కడే మృతి చెందగా.. మరో ఇద్దరికి తీవ్ర గాయాలయ్యాయి.

మృతి చెందిన వారిలో ఒకరు మంచిర్యాల జిల్లా శ్రీరాంపూర్​కు చెందిన వేముల ప్రణయ్ కుమార్, వివేక్ చంద్రగా పోలీసులు గుర్తించారు. అంకరి స్వరాజ్, శివకేశవ్​లు గాయపడ్డారు. వీళ్లంతా విద్యార్థులని.. అతివేగం వల్లే ఈ ప్రమాదం జరిగి ఉంటుందని అనుమానం వ్యక్తం చేస్తున్నారు. ఈ మేరకు కేసు నమోదు చేసుకుని దర్యాప్తు చేస్తున్నారు.