Bandi Sanjay Padayatra: తెలంగాణలో అధికారమే లక్ష్యంగా బీజేపీ రాష్ట్ర అధ్యక్షుడు బండి సంజయ్ చేపట్టిన ప్రజా సంగ్రామ యాత్ర ఐదో విడత నేటితో ముగియనుంది. గత నెల 28న నిర్మల్‌ జిల్లా భైంసాలో మొదలైన పాదయాత్ర.. ఐదు జిల్లాల్లో 18 రోజులు, 222 కిలోమీటర్లు సాగింది. ముథోల్‌, నిర్మల్‌, ఖానాపూర్‌, కోరుట్ల, వేములవాడ, జగిత్యాల, చొప్పదండి, కరీంనగర్ నియోజకవర్గాల్లో పర్యటించగా.. ఇవాళ కరీంనగర్‌లో ఐదో విడత ప్రజా సంగ్రామ యాత్ర ముగియనుంది.
భారీ బహిరంగ సభ..: పాదయాత్ర ముగింపు సందర్భంగా ఎస్ఆర్ఆర్ కళాశాల మైదానంలో బీజేపీ రాష్ట్ర నాయకత్వం భారీ బహిరంగ సభ నిర్వహిస్తోంది. ముగింపు సభకు పార్టీ జాతీయ అధ్యక్షుడు జేపీ నడ్డా ముఖ్య అతిథిగా హాజరుకానున్నారు. ప్రజా సంగ్రామ యాత్ర ముగింపు సభను పార్టీ రాష్ట్ర నాయకత్వం ప్రతిష్ఠాత్మకంగా తీసుకుంది. తెలంగాణ ఉద్యమం ఉవ్వెత్తున ఎగిసి.. కేసీఆర్ గ్రాఫ్ కరీంనగర్‌లోనే అమాంతంగాపెరిగింది. కేసీఆర్ రాజకీయ భవిష్యత్తుకు అగ్రపీఠం వేసిన కరీంనగర్‌లోనే.. సభను విజయవంతం చేసి బీఆర్ఎస్ పని అయిపోయిందనే సంకేతాలు పంపాలని బీజేపీ యోచిస్తోంది.
రాష్ట్రంలో రాబోయేది బీజేపీ సర్కారేనని సంకేతాలు..: బీఆర్ఎస్ ఎమ్మెల్యేల కొనుగోలు వ్యవహారం, దిల్లీ లిక్కర్‌ స్కామ్, బీఆర్ఎస్ ఆవిర్భావంపై జేపీ నడ్డా ఏం వ్యాఖ్యలు చేస్తారనే చర్చ రాజకీయ వర్గాల్లో వినిపిస్తోంది. బహిరంగ సభ కోసం భారీగా జన సమీకరణ చేయాలని రాష్ట్ర నాయకత్వం లక్ష్యంగా పెట్టుకుంది. ప్రజలు స్వచ్ఛందంగా తరలివచ్చేలా ఏర్పాట్లు చేశారు. ముఖ్యంగా రాష్ట్రంలోని పోలింగ్ బూత్ కమిటీ సభ్యులంతా హాజరయ్యేలా ప్రణాళిక రూపొందించారు. బహిరంగ సభను విజయవంతం చేయడం ద్వారా రాష్ట్రంలో రాబోయేది బీజేపీ సర్కారేనని సంకేతాలు ఇవ్వాలని కమలదళం భావిస్తోంది. బహిరంగ సభ వేదిక నుంచే ఆరో విడత ప్రజా సంగ్రామ యాత్ర షెడ్యూల్‌ను ప్రకటించేందుకు బీజేపీ రాష్ట్ర నాయకత్వం ప్రణాళికలు సిద్ధం చేసుకున్నట్లు సమాచారం.