Student dies in Hostel: కామారెడ్డి జిల్లా బీర్కూర్ బీసీ బాలుర వసతి గృహంలో విద్యార్థి అనుమానాస్పద మృతి ఆందోళనకు దారితీసింది. నస్రుళ్లబాద్ మండలంలోని దుర్కి గ్రామానికి చెందిన సాయిరాజ్ అనే విద్యార్థి ఐదో తరగతి చదువుతున్నాడు. అర్ధరాత్రి వాంతులు అవ్వటంతో ఆస్పత్రికి తరలించినట్లు హాస్టల్ సిబ్బంది తెలిపారు. తెల్లవారుజామున 5 గంటలకు సాయిరాజ్ మృతి చెందాడన్నారు.
వసతి గృహం చుట్టూ మురికి నీరు, గడ్డి ఎక్కువగా ఉండటంతో తరచూ విష సర్పాలు, కీటకాలు వస్తున్నాయని.. వార్డెన్కు పలుమార్లు ఫిర్యాదు చేసినా అసలు పట్టించుకోలేదని పలువురు విద్యార్థులు ఆరోపించారు. శుక్రవారం హాస్టల్లోకి పాము వచ్చిందని.. అందరూ కలిసి చంపేసినట్లు తెలిపారు. ఇదిలా ఉండగా మృతుడు సాయిరాజ్ బంధువులు వసతి గృహానికి చేరుకొని ఆందోళన చేశారు. పాఠశాల సిబ్బంది, పోలీసులతో వాగ్వాదానికి దిగారు. వార్డెన్ నిర్లక్ష్యం కారణంగానే తమ కుమారుడు మృతి చెందాడని ఆరోపించారు.