జోగులాంబ జిల్లా వ్యవసాయానికి, ముఖ్యంగా విత్తన పత్తి సాగుకు పెట్టింది పేరు. ఆగస్టులో పనులు ఊపందుకుంటాయి. కూలీల కొరతతో తల్లిదండ్రులే పిల్లలను బడి మాన్పించి పనులకు తీసుకెళ్తారు. ఇలా రెండు నెలలు చదువుకు దూరమైన పిల్లల్లో అత్యధికులు మళ్లీ బడి ముఖం చూడటం లేదు. ఫలితంగా విద్యలోనే కాదు అభివృద్ధిలోనూ జిల్లా వెనుకబడుతోంది. బడిబయట పిల్లలను పాఠశాలల్లో చేర్పించేందుకు పోలీసు శాఖ ఆపరేషన్‌ ముస్కాన్‌ కార్యక్రమాన్ని చేపట్టింది.
జోగులాంబ గద్వాల జిల్లా విత్తన పత్తితోపాటు బాలకార్మిక వ్యవస్థ, బాల్య వివాహాలు, నిరక్షరాస్యతకు కూడా చిరునామాగా మారింది. ఈ సమస్యల పరిష్కారానికి విద్యాశాఖతోపాటు వివిధ స్వచ్ఛంద సంస్థలు చాలా ప్రయత్నాలే చేస్తున్నాయి. మార్పు మాత్రం పెద్దగా కనిపించటం లేదు. ఏటా బడిబయట ఉన్న పిల్లల సంఖ్య వేలల్లోనే ఉంటోంది. ఐకేపీ సిబ్బంది, విద్యాశాఖలు నిర్వహించిన సర్వేలోనే జిల్లాలో 2,180 మంది బడిబయట ఉన్నట్లు గుర్తించారు. ఎంవీ ఫౌండేషన్‌ నిర్వహించిన సర్వేలో ఇందుకు రెండింతల మంది పిల్లలు బడిబయటే ఉన్నట్లు తేలింది.
ఈ విద్యా సంవత్సరం ప్రారంభంలో అయిదు రోజుల పాటు నిర్వహించిన బడిబాటలో ఉపాధ్యాయులు బడిబయట ఉన్న పిల్లలు 179 మాత్రమే చేర్చుకోగలిగారు. ఇప్పుడు పోలీసు శాఖ ఆపరేషన్‌ ముస్కాన్‌ చేపట్టింది. దీనిపై మంగళవారం జిల్లా ఇన్‌ఛార్జి ఎస్పీ అపూర్వారావు ప్రత్యేక బృందాలతో చేయాల్సిన కృషిపై సూచనలు చేశారు. ఈ కార్యక్రమమైనా పకడ్బందీగా అమలు చేస్తే బడిబయట పిల్లలందరూ మళ్లీ చదువుబాట పట్టే అవకాశం ఉంటుంది. చిన్నారుల బంగారు భవిష్యత్తుకు భరోసా దక్కుతుంది.