జయశంకర్ భూపాలపల్లి జిల్లాలోని పలు ప్రాంతాలను కంటైన్మెంట్ జోన్లుగా గుర్తించారు అధికారులు. కరోనా కేసులు అధికంగా నమోదైన ప్రాంతాలను కంటైన్మెంట్ జోన్లుగా ప్రకటిస్తూ కలెక్టర్ కృష్ణ ఆదిత్య ఉత్తర్వులు జారీ చేశారు. జిల్లాలో వైరస్ వ్యాప్తిని నివారించడానికి చేపడుతున్న చర్యల్లో భాగంగా నిర్ణయం తీసుకున్నట్లు వివరించారు.
కంటైన్మెంట్ ప్రాంతాలివే..
భూపాలపల్లి పట్టణంలోని కార్ల్ మార్క్స్ కాలనీ, సుభాశ్ కాలనీ, క్రిష్ణ కాలనీ, జవహర్ నగర్ కాలనీ, నాగారం, మహదేవపూర్ మండలంలోని అన్నారం, మహాముత్తారం మండలంలోని నిమ్మగూడెం, కాటారం మండలంలోని జాదవరావుపేట్, గంగాపూర్(గుండ్రాతిపల్లి).. గ్రామాల్లో రేపటి నుంచి కఠిన ఆంక్షలు అమలు చేయనున్నట్లు కలెక్టర్ తెలిపారు.
కంటైన్మెంట్ జోన్లలో ప్రజలు బయటికి రాకుండా చర్యలు తీసుకోవాలని అధికారులను ఆదేశించారు కలెక్టర్. వైద్యసేవలు, నిత్యావసరాల విషయంలో ఎలాంటి ఇబ్బందులు లేకుండా చూడాలని కోరారు. ఆయా ప్రాంతాలను ఎప్పటికప్పుడు శానిటైజ్ చేయాలని సూచించారు. ప్రజలంతా ప్రభుత్వ సూచనలను పాటిస్తూ ఇళ్లలోనే ఉండాలని విజ్ఞప్తి చేశారు. కరోనా కట్టడికి అంతా సహకరించాలని కోరారు.
ఇదీ చదవండి:వచ్చే నెల నుంచి 18ఏళ్లు పైబడిన వారికి కూడా వ్యాక్సినేషన్
