ప్రేమ విఫలమైందని.. యువతి ఆత్మహత్య

ప్రేమ విఫలమై మానసిక ఆందోళనకు గురైన ఓ యువతి ఇంట్లో ఉరేసుకొని ఆత్మహత్య చేసుకుంది. ఈ ఘటన హైదరాబాద్​లోని గాంధీనగర్‌ పోలీసు స్టేషన్‌ పరిధిలో జరిగింది. పోలీసులు కేసు నమోదు చేసుకుని దర్యాప్తు చేపట్టారు.

ప్రేమ విఫలమైందనే మనస్తాపంతో ఓ న్యూస్ ఛానల్​లో పనిచేసే ఉద్యోగిని ఆత్మహత్య చేసుకున్న ఘటన హైదరాబాద్ గాంధీనగర్ పోలీస్ స్టేషన్ పరిధిలో చోటు చేసుకుంది. సిద్దిపేటకు చెందిన పి.రాములు కుమార్తె కల్యాణి (26) ఓ న్యూస్ చానల్​లో విధులు నిర్వహిస్తూ, గత రెండేళ్లుగా అదే ఛానల్​లో పనిచేస్తున్న ఓ యువకుడితో ప్రేమలో పడింది. ఇటీవల తనను వివాహం చేసుకోవాలని కల్యాణి కోరగా, అతను నిరాకరించడం వల్ల తాను బతకడం వృథా అని భావించిన ఆమె.. బోలక్ పూర్​లోని తన సోదరుడు సుమన్ ఇంట్లో ఎవరూ లేని సమయంలో ఫ్యాన్​కు ఉరేసుకుని ఆత్మహత్యకు పాల్పడింది.
సుమన్​ విధులు ముగించుకుని వచ్చేసరికి కల్యాణి మృతదేహం ఫ్యాన్​కు వేలాడుతూ కనిపించింది. ఈ సమాచారం తెలుసుకున్న గాంధీనగర్ పోలీసులు మృతదేహాన్ని ఉస్మానియా ఆస్పత్రికి తరిలించి, పోస్టుమార్టం అనంతరం బంధువులకు అప్పగించారు. ఈ కేసును గాంధీనగర్ పోలీసులు దర్యాప్తు చేస్తున్నారు.

ఇవీ చూడండి: బ్యాంకు అధికారినంటూ టోకరా​.. లక్షా 90వేలు మాయం