Wards Governance in GHMC : జీహెచ్‌ఎంసీలో వార్డుల పాలనకు నేడు శ్రీకారం

Wards Governance in GHMC Starts From Today : హైదరాబాద్‌ జంట నగరాల్లో నేటి నుంచి వార్డు కార్యాలయాలు అందుబాటులోకి రానున్నాయి. జీహెచ్‌ఎంసీ పరిధిలోని 150 డివిజన్లలో వార్డుకో కార్యాలయాన్ని ప్రారంభించనున్నారు. వార్డు కార్యాలయానికి అసిస్టెంట్ మున్సిపల్ కమిషనర్ స్థాయి అధికారి బాధ్యులుగా ఉండగా.. వివిధ శాఖలకు చెందిన 10మంది అధికారులు అందుబాటులో ఉండనున్నారు. వార్డు కార్యాలయాల ప్రారంభోత్సవాలకు జీహెచ్‌ఎంసీ ఏర్పాట్లు పూర్తిచేసింది.

GHMC Wards Inauguration today :పరిపాలన వికేంద్రీకరణ, ప్రజలకు మెరుగైన సేవలు అందిచటమే లక్ష్యంగా ప్రభుత్వం హైదరాబాద్‌లో వార్డు కార్యాలయాలను ఏర్పాటు చేస్తోంది. తెలంగాణ దశాబ్ది ఉత్సవాల్లో భాగంగా నేడు జీహెచ్​ఎంసీలోని పలు వార్డు కార్యాలయాలను ప్రజాప్రతినిధులు ప్రారంభించనున్నారు. ప్రజలు తమ సమస్యలను ఫిర్యాదు చేసిన వెంటనే పరిష్కారం లభించేలా ఈ కార్యాలయాలు పనిచేయనున్నాయి.

Wards Governance in GHMC Starts From Today : ఇక్కడ రోడ్లు, డ్రైనేజీల వంటి వాటి నిర్వహణకు ఇంజినీరింగ్ సిబ్బంది, భవన నిర్మాణానికి సంబంధించిన అంశాలపై టౌన్ ప్లానింగ్ సిబ్బంది, దోమల సమస్యకు ఎంటమాలజీ విభాగం అధికారులు అందుబాటులో ఉంటారు. మహిళా సంఘాలకు ఉపయుక్తంగా ఉండేలా వార్డు కమ్యూనిటీ ఆఫీసర్, పారిశుద్ధ్య సిబ్బంది సమన్వయానికి వార్డు శానిటరీ జవాన్, అర్బన్ బయోడైవర్సిటీ సూపర్‌వైజర్, తాగునీటి సరఫరా, మురుగునీటి నిర్వహణకు జలమండలి నుంచి వార్డు అసిస్టెంట్, విద్యుత్ శాఖ తరఫున వార్డు లైన్‌మెన్, ఓ కంప్యూటర్ ఆపరేటర్.. ఈ కార్యాలయాల్లో ఉంటారు.

Wards Governance in GHMC : వార్డు అధికారుల జాబ్ చార్టుతో పాటు పౌరుల ఫిర్యాదులను ఎంత కాలంలో పరిష్కరిస్తారో చెప్పే సిటిజన్ చార్ట్‌ని ఇక్కడ ఏర్పాటు చేశారు. స్థానిక వార్డు కార్యాలయానికి కాకుండా ఇతర వార్డు కార్యాలయంలో ప్రజలు ఫిర్యాదు చేస్తే, వాటిని స్వీకరించి రిజిస్ట్రేషన్ చేసుకోవాల్సిన బాధ్యత వీరిపై ఉంటుంది. ప్రభుత్వ కార్యాలయాలు లేదా జీహెచ్‌ఎంసీవిభాగాలతో సమన్వయం చేసుకోవాల్సిన బాధ్యత వార్డు అధికారులపై ఉంటుంది.

పురపాలక శాఖ మంత్రి కేటీఆర్‌ కాచిగూడ వార్డు కార్యాలయాన్ని ప్రారంభించనున్నారు. మంత్రి రెజిమెంటల్ బజార్‌లో ఏర్పాటు చేసిన వార్డు కార్యాలయంతో పాటు మరిన్ని కార్యాలయాలను మంత్రి తలసాని శ్రీనివాస్ ప్రారంభిస్తారు. అంజాపుర వార్డులో హోంమంత్రి మహమూద్ అలీ, బంజారాహిల్స్‌తో పాటు మరిన్ని కార్యాలయాలను మేయర్ గద్వాల్‌ విజయలక్ష్మి, అమీర్‌పేట్ బీకే గూడ కార్యాలయాన్ని సీఎస్‌ శాంతికుమారి ప్రారంభిస్తారు. మిగతా చోట్ల స్థానిక ఎమ్మెల్యేలు, ఎమ్మెల్సీలు ప్రారంభించనున్నారు.

హైదరాబాద్‌లో ఒక వార్డు పరిధిలో.. ఓ మున్సిపాల్టీతో సమానమైన జనాభా ఉంది. కానీ, ఇంతకాలం ఒక పురపాలక సంఘానికి ఉన్నంత సిబ్బంది, ఇతర సదుపాయాలు వార్డులో ఉండేవి కావు. ఇలాంటి పరిస్థితుల్లోనే ప్రజలకు పరిపాలన సేవలు చేరువయ్యేలా వార్డుకు కనీసం పది మంది వివిధ విభాగాల సిబ్బందిని అందుబాటులో ఉంచుతూ వార్డు కార్యాలయాలను ఏర్పాటు చేస్తున్నట్లు ప్రభుత్వం చెబుతోంది. అసిస్టెంట్ మున్సిపల్ కమిషనర్ స్థాయి అధికారి వార్డ్ కార్యాలయానికి ఇన్చార్జిగా ఉంటారని ప్రభుత్వం తెలిపింది. పారిశుద్ధ్యం, విద్యుత్‌, టౌన్‌ప్లానింగ్‌ వంటి వాటిపై ఫిర్యాదు చేసుకునేందుకు ప్రభుత్వం అవకాశం కల్పించనుంది.

ఇవీ చదవండి :