Vehicles Increasing In Hyderabad : గ్రేటర్ హైదరాబాద్ వ్యాప్తంగా కొత్త వాహనాలు రోడ్లపై పరుగులు పెడుతున్నాయి. ద్విచక్ర వాహనాలతో పాటు ఖరీదైన కార్ల కొనుగోలుకు ప్రజలు ఆసక్తి చూపుతున్నారు. దీంతో జీవిత కాల పన్నుల ద్వారా రవాణా శాఖకు భారీ మొత్తంలో ఆదాయం సమకూరుతుంది. 2022-23 సంవత్సరంలో హైదరాబాద్‌తో పోలిస్తే.. రంగారెడ్డిలో వాహన కొనుగోళ్లు ఎక్కువగా జరిగినట్లు రవాణా శాఖ గణాంకాలు వెల్లడిస్తున్నాయి.
రంగారెడ్డి జిల్లా పరిధిలో మొత్తం రూ.1,523.66 కోట్ల రెవెన్యూ రాగా.. అందులో రూ.1,243.06 కోట్లు కొత్త వాహనాల రిజిస్ట్రేషన్ ద్వారా సమకూరినట్లు రవాణా శాఖ అధికారులు పేర్కొంటున్నారు. హైదరాబాద్లో గడిచిన ఏడాదిలో రూ.1,323 కోట్ల ఆదాయం రాగా.. రూ.1,078 కోట్లు జీవిత కాలం పన్ను రూపంలో సమకూరింది. ముఖ్యంగా రూ.10 లక్షలు.. ఆపైన ఖరీదైన కార్లు కొనడానికి చాలా మంది ఆసక్తి చూపుతున్నారు. ప్రస్తుతం మొదటి వాహనానికి 17 శాతం, రెండో వాహనానికి 18 శాతం లైఫ్ ట్యాక్స్ చెల్లించాల్సి ఉంటుంది.
వాహనాల కొనుగోలు ద్వారా రవాణా శాఖకు కాసుల వర్షం కురుస్తోంది. నగరం విస్తరించడంతో పాటు చాలా మంది శివార్లలో నివాసాలు ఏర్పాటు చేసుకుంటున్నారు. ఔటర్ రింగ్ రోడ్ల వైపు నివాస సముదాయాలు పెరుగుతున్నాయి. దీంతో నగర శివారు చిరునామాతో కొత్త వాహనాల రిజిస్ట్రేషన్లు జరుగుతున్నాయి. దీంతో నగరం కంటే శివార్లలోనే రవాణా శాఖ ఆదాయం రెట్టింపు అవుతోంది. కొత్త వాహనాల కొనుగోలులో అంతకు ముందు ఏడాదితో పోల్చితే.. రంగారెడ్డిలో ఈసారి ఏకంగా 75 శాతం వృద్ది నమోదైనట్లు రవాణా శాఖ అధికారులు చెబుతున్నారు.
రంగారెడ్డి జిల్లాలో ఇలా..:
| పన్నుల వివరాలు | 2022-23 | 2021-22 | వృద్ధి శాతం |
| క్వార్టర్లీ ట్యాక్స్ | 127.36 | 73.8 | 72.8 |
| లైఫ్ ట్యాక్స్ | 1,243.05 | 706.48 | 75.9 |
| ఫీజులు | 107.85 | 65.56 | 64.56 |
| జరిమానాలు | 25.4 | 8.02 | 216.7 |
| సేవా రుసుం | 20.0 | 16.43 |