మృగశిరకార్తె రోజు ముషీరాబాద్ చేపల మార్కెట్ వెలవెల

మృగశిర కార్తె నేపథ్యంలో రాష్ట్రంలోనే అతిపెద్ద చేపల మార్కెట్​ ముషీరాబాద్​కు ఆదివారం జనం పోటెత్తగా సోమవారం ఒక్కసారిగా జనం లేక మార్కెట్ బోసిపోయింది. నగరవాసులతోపాటు చిన్న వ్యాపారులు, రిటైల్ వ్యాపారులు, మార్కెట్​కు భారీగా తరలివచ్చారు. మహా నగరంలో కరోనా విజృంభిస్తోన్న సందర్భంలో జనం గూమిగూడకుండా పోలీసులు చర్యలు తీసుకున్నారు.

హైదరాబాద్ ముషీరాబాద్​లోని చేపల మార్కెట్​లో లాక్​డౌన్ నియమ నిబంధనలు పాటించక పోవడం వల్ల పోలీసులు చర్యలు తీసుకున్నారు. ఫలితంగా మార్కెట్​లో జనం లేక వెలవెలబోయింది. మృగశిర కార్తె రోజు చేపలు తినడం ఆనవాయితీగా ఉన్న నేపథ్యంలో ముషీరాబాద్ చేపల మార్కెట్​పై పోలీసులు ప్రత్యేక దృష్టి సారించారు. ఉదయం నుంచే పోలీసులు పహారా కాస్తూ భౌతిక దూరాన్ని పాటించని వ్యాపారస్తులను మందలించారు.

భౌతిక దూరం పాటించలేదు !

మృగశిర కార్తెను పురస్కరించుకుని తెలుగు రాష్ట్రాల నుంచి అనేక రకాల చేపల లారీలు.. పెద్ద ఎత్తున ముషీరాబాద్ మార్కెట్​కు దిగుమతి అయ్యాయి. మార్కెట్ నుంచి చేపలు కొనుగోలు చేయడానికి ప్రజలు, చిన్న వ్యాపారులు, రిటైల్ వ్యాపారులు, మార్కెట్​కు పెద్ద ఎత్తున తరలివచ్చారు. స్థానిక వ్యాపారస్తులూ భౌతిక దూరం పాటించలేదు.

స్పందించిన పోలీసులు..

ఆదివారం మార్కెట్​పై ఈటీవీ భారత్​-ఈనాడులో ప్రత్యేక కథనాలు రావడం వల్ల ముషీరాబాద్ పోలీసులు స్పందించారు. చేపలు శుభ్రం చేసి కట్ చేసిన వారిని ఆ ప్రాంతం నుంచి తొలగించి ఇతర వీధుల్లోకి తరలించారు. పోలీసులు తీసుకున్న చర్యల ఫలితంగా మార్కెట్​ అంతా ఒక్కసారిగా ప్రశాంతత సంతరించుకుంది. భరించలేని దుర్వాసన, మురికి నీరు రోడ్లపైకి ప్రవహిస్తుండటం పట్ల స్థానికులు ఆందోళన వ్యక్తం చేశారు.

ఇవీ చూడండి : అవినీతి సొమ్మేనా?.. అ.ని.శా. విచారణకు సుజాత