మొదటి విడత ఇంజినీరింగ్​ సీట్ల కేటాయింపు పూర్తి

ఇంజినీరింగ్​ మొదటి విడత  సీట్ల కేటాయింపు పూర్తయింది. మొత్తం 49,012 సీట్లు భర్తీ అయ్యాయి. మరో 16,432 సీట్లు మిగిలాయి. ఎంసెట్ అభ్యర్థులకు బీ ఫార్మసీలో 87, ఫార్మ్ డీలో 30 సీట్లు కేటాయించారు. రాష్ట్రవ్యాప్తంగా 13 యూనివర్సిటీ అనుబంధ, 36 ప్రైవేట్ కాలేజీల్లో వంద శాతం సీట్లు భర్తీ అయ్యాయి. మొత్తం 38 కోర్సులు ఉండగా.. 25 కోర్సుల్లో సీట్లన్నీ నిండిపోయాయి. సీఎస్ఈ, ఈసీఈ, ఐటీ కోర్సుల్లో చేరేందుకే విద్యార్థులు ఎక్కువగా మొగ్గు చూపారు. సివిల్, మెకానికల్, ట్రిపుల్​ఈలో భారీగా సీట్లు మిగిలాయి.

తొలి దఫా ఇంజినీరింగ్​ సీట్ల కేటాయింపు ప్రక్రియ పూర్తయింది. కన్వీనర్​ కోటాలో 65 వేల 444 సీట్లు ఉండగా 49 వేల 12 సీట్లు భర్తీ అయ్యాయి. ఎంపీసీ కోటా బీఫార్మసీలో 3 వేల 280 సీట్లు ఉండగా 87 సీట్లు, ఫార్మ్​డీలో 535 సీట్లుండగా 30 సీట్ల కేటాయింపు పూర్తయింది. మొదటి విడత కౌన్సెలింగ్​ తర్వాత ఇంజినీరింగ్​లో 16 వేల 432 సీట్లు, బీ ఫార్మసీలో 3 వేల 193, ఫార్మ్​డీలో 505 సీట్లు మిగిలాయి.

13 కళాశాలల్లో సీట్లన్నీ భర్తీ

విశ్వవిద్యాలయాల కళాశాలలకు ఈ ఏడాది కూడా విద్యార్థుల నుంచి డిమాండ్ కనిపించింది. రాష్ట్రంలో 14 యూనివర్సిటీ కాలేజీలు ఉండగా వాటిలో 99.93 శాతం సీట్లు నిండిపోయాయి. మొత్తం 13 కళాశాలల్లో సీట్లన్నీ భర్తీ కాగా... మరో కాలేజీలో కేవలం రెండు సీట్లు మాత్రమే మిగిలాయి. రాష్ట్రవ్యాప్తంగా 36 ప్రైవేట్ కాలేజీల్లో వంద శాతం సీట్లు భర్తీ అయ్యాయి. రాష్ట్రంలో మొత్తం 38 కోర్సులు ఉండగా... వాటిలో 25 కోర్సుల్లో సీట్లన్నీ నిండిపోయాయి.

ఐటీ కోర్సులకు డిమాండ్​

సీఎస్ఈ, ఈసీఈ, ఐటీ కోర్సులను ఎక్కువ మంది విద్యార్థులు ఎంచుకున్నారు. సివిల్, మెకానికల్, ట్రిపుల్ఈలో దాదాపు సగం సీట్లు మిగిలాయి. మిగిలిన సీట్ల కోసం రెండో విడత కౌన్సెలింగ్ నిర్వహించనున్నారు. మొదటి విడతలో సీట్లు పొందిన అభ్యర్థులు ఈనెల 15లోగా ఆన్ లైన్ లో రుసుము చెల్లించి.. కళాశాలల్లో సెల్ఫ్ రిపోర్టింగ్ చేయాలని కన్వీనర్ నవీన్ మిత్తల్ తెలిపారు.

సీట్ల కేటాయింపు వివరాలు

	కోర్సు	కేటాయించిన సీట్లు	మిగిలిన సీట్లు
1	సివిల్	4860	3503
2	కంప్యూటర్ సైన్స్(సీఎస్ఈ)	16287	961
3	ఎలక్ట్రానిక్స్ అండ్ కమ్యూనికేషన్స్(ఈసీఈ)	12352	3229
4	ఎలక్ట్రికల్ అండ్ ఎలక్ట్రానిక్స్ (ఈఈఈ)	4552	3730
5	ఇన్ఫర్మేషన్ టెక్నాలజీ (ఐటీ)	4192	80
6	మెకానికల్ ఇంజినీరింగ్	4551	4642
7	ఎలక్ట్రానిక్స్ అండ్ ఇన్ స్ట్రుమెంట్స్	287	35