Telangana Govt letter to KRMB :కృష్ణానదీ యాజమాన్య బోర్డుకు తెలంగాణ ప్రభుత్వం లేఖ రాసింది. అనుమతులు లేకుండా, విభజన చట్టానికి విరుద్ధంగా ఆంధ్రప్రదేశ్ ప్రభుత్వం టెండర్లు పిలవటంపై ఫిర్యాదు చేసింది. అనుమతులు లేకుండా చేపడుతున్న గాలేరు నగరి, హంద్రీనీవా, తెలుగుగంగ ప్రాజెక్టుల విస్తరణ పనులు నిలిపివేసేలా చూడాలని తెలంగాణ ప్రభుత్వం కృష్ణా నదీ యాజమాన్య బోర్డును కోరింది. ఈ మేరకు తెలంగాణ నీటిపారుదల శాఖ ఇంజినీర్ ఇన్ చీఫ్ మురళీధర్ కేఆర్ఎంబీ ఛైర్మన్కు లేఖ రాశారు.
బచావత్ ట్రైబ్యునల్ను ఉల్లంఘిస్తూ, విభజన చట్టానికి విరుద్ధంగా కృష్ణ బేసిన్ వెలుపలకు నీటిని తరలించేందుకు చేపట్టిన గాలేరు నగరి, హంద్రీనీవా, తెలుగుగంగ ప్రాజెక్టుల పనులు, విస్తరణ పనులు ఆపాలని గతంలో బోర్డుకు ఫిర్యాదు చేసినట్లు లేఖలో పేర్కొన్నారు. అయినప్పటికీ ఏపీ ప్రభుత్వం ఇటీవల వివిధ పనులకు టెండర్లు పిలిచిందని ఈఎన్సీ తెలిపారు.
Telangana Complains about Construction of AP Projects :గాలేరు నగరి నుంచి హంద్రీనీవాకు నీటిని తరలించేందుకు ఎత్తిపోతల, అన్నమయ్య జిల్లాలో కలిబండ, బెస్తపల్లి, జరికొండ రెండో దశ ఎత్తిపోతల పథకాలు, సత్యసాయి గంగ కాల్వపై క్రాస్ రెగ్యులేటర్ నిర్మాణం, కడప జిల్లా కలసపాడు మండలంలో ఎత్తిపోతల పథకాలు, కాసినాయన మండలంలో ఎత్తిపోతల పథకం నిర్మాణం కోసం టెండర్లు పిలిచినట్లు లేఖలో పేర్కొన్నారు.