Telangana Governor What Next Plan: బడ్జెట్ సమావేశాల తేదీలు ఖరారైన తరుణంలో ఇప్పుడు గవర్నర్ తమిళిసై ఏం చేస్తారన్నది ఆసక్తికరంగా మారింది. బడ్జెట్ సమావేశాల ప్రారంభం సందర్భంగా తన ప్రసంగం లేకపోవడంపై గత ఏడాది తీవ్ర వ్యాఖ్యలు చేసిన తమిళిసై.. ఈసారి ఎలా స్పందిస్తారని ఉత్కంఠ రేపుతోంది. ఉభయ సభలు ఆమోదించిన బిల్లులపై ఇంకా ఎలాంటి నిర్ణయం తీసుకోని గవర్నర్.. బడ్జెట్ విషయంలో ఏం చేస్తారన్నది ఇప్పుడు చర్చనేయాంశమైంది.
రాష్ట్రంలో గవర్నర్కు, రాష్ట్ర ప్రభుత్వానికి మధ్య దూరం బాగా పెరిగింది. గత గణతంత్ర దినోత్సవం, బడ్జెట్ సమావేశాల సందర్భంగా విభేదాలు బహిరంగంగా వ్యక్తమయ్యాయి. తాజాగా మళ్లీ ఈ ఏడాది గణతంత్ర దినోత్సవంతో పాటు బడ్జెట్ సమావేశాలు సమీపించాయి. బడ్జెట్ సమావేశాల ముహూర్తాన్ని వచ్చే నెల మూడో తేదీగా రాష్ట్ర ప్రభుత్వం ఖరారు చేసింది. గత సమావేశాల కొనసాగింపుగానే ఉభయ సభలు ఈసారి కూడా సమావేశం అవుతున్నాయి.
Telangana Budget meetings On Feb3: దీంతో గవర్నర్‌తో సంబంధం లేకుండానే ప్రభుత్వ నిర్ణయం మేరకు శాసనసభ సచివాలయం సభ్యులకు సమాచారం పంపింది. ఉభయ సభలను ప్రోరోగ్ చేయకపోవడంతో కొత్త సమావేశాలు కాకుండా గత సమావేశాలను కొనసాగించారు. దీంతో ఈసారీ ఉభయ సభల సభ్యులను ఉద్దేశించి గవర్నర్ ప్రసంగించే అవకాశం లేదు. నిరుడు బడ్జెట్ సమావేశాల్లోనూ గవర్నర్ ప్రసంగం లేదు. ఈ విషయంపై గవర్నర్ తమిళిసై సౌందరరాజన్ బహిరంగంగానే రాష్ట్ర ప్రభుత్వ వైఖరిని తప్పు పట్టారు.