TDP HOUSE ARREST: ఏపీగుంటూరు జిల్లా తాడికొండ మండలం కంతేరులో తెదేపా సానుభూతిపరురాలైన వెంకాయమ్మపై వైకాపా కార్యకర్తల దాడిని నిరసిస్తూ.. ఆ పార్టీ చలో కంతేరుకు పిలుపునిచ్చింది. దీంతో అప్రమత్తమైన పోలీసులు భారీగా సిబ్బందిని మోహరించారు. తాడికొండ, కంతేరులో భారీగా పోలీసు బందోబస్తు ఏర్పాటు చేశారు. తెదేపా పొలిట్‌బ్యూరో సభ్యుడు నక్కా ఆనంద్‌బాబును గృహనిర్బంధం చేశారు. బయటకు రాకుండా అడ్డుకున్నారు. పోలీసులు తీరును తప్పుబట్టిన ఆయన ఎలాగైనా కంతేరు వెళ్తామన్నారు.
తాడేపల్లిలో తెదేపా నేత తెనాలి శ్రావణ్ కుమార్ను పోలీసులు గృహనిర్బంధం చేశారు. అనుమతి లేకుండా బయటికి వెళ్లరాదంటూ సీఐ శ్రావణ్ ఆయనకు తేల్చి చెప్పారు. పార్టీ కార్యాలయానికి వెళ్తుంటే అడ్డుకోవడానికి మీరు ఎవరని పోలీసులను శ్రావణ్ కుమార్ ప్రశ్నించారు. కార్యాలయానికి పోవడం తన హక్కు అన్నారు. కంతేరు వెళ్లకుండా కృష్ణా-గుంటూరు జిల్లా తెలుగుదేశం నేతలను పోలీసులు ఎక్కడికక్కడ గృహానిర్భంధం చేస్తున్నారు. విజయవాడలో దేవినేని ఉమా, నందిగామలో తంగిరాల సౌమ్యలను గృహ నిర్బంధం చేసారు.
కంతేరులోనూ పోలీసులు గట్టి బందోబస్తు చర్యలు చేపట్టారు. గ్రామానికి వచ్చే అన్ని మార్గాలను ప్రత్యేక బలగాలను మోహరించారు. గ్రామాలకు వచ్చే వారిని క్షుణ్ణంగా తనిఖీ చేసిన తర్వాతే అనుమతిస్తున్నారు. గ్రామంలోనూ పోలీసులు పటిష్ట బందోబస్తు ఏర్పాటు చేశారు. సుమారు నాలుగు వందల మంది పోలీసులతో భద్రతను పర్యవేక్షిస్తున్నారు. తుళ్లూరు డీఎస్పీ పోతురాజు ఆధ్వర్యంలో భారీ భద్రతను ఏర్పాటు చేశారు. వెంకాయమ్మ ఇంటి చుట్టూ 30 మంది పోలీసులు విధులు నిర్వహిస్తున్నారు. గ్రామంలో ద్విచక్రవాహనాలపై తిరుగుతూ భద్రతను పర్యవేక్షిస్తున్నారు.