ఎన్​ఓసీ పత్రాల కోసం డబ్బుల డిమాండ్..హోంగార్డు సహా మరో ఇద్దరు అరెస్టు

హైదరాబాద్​ ఎస్​ఆర్​ నగర్​ ఠాణాలోని హోంగార్డు, మరో ఇద్దరు వ్యక్తులు విద్యార్థులు, ఉద్యోగులకు ఎన్​ఓసీ ధ్రువపత్రాలు ఇప్పిస్తానని డబ్బు వసూలు చేశారు. దీనిపై ఫిర్యాదు అందుకున్న ఉన్నతాధికారులు దర్యాప్తు జరిపి వారిపై కేసు నమోదు చేశారు.

రాష్ట్రంలో కొనసాగుతున్న లాక్‌డౌన్​ను అడ్డుపెట్టుకుని వసూళ్లకు పాల్పడిన హోంగార్డుతోపాటు మరో ఇద్దరిపై పోలీసులు కేసు నమోదు చేశారు. హైదరాబాద్​ ఎస్‌ఆర్‌ నగర్​లోని ప్రైవేటు వసతి గృహాల్లో ఉంటున్న విద్యార్థులు, ఉద్యోగులు లాక్​డౌన్​ నేపథ్యంలో వసతి గృహాలు మూసివేయడం వల్ల తమతమ సొంతూళ్లకు వెళ్లడానికి ఎస్‌ఆర్‌ నగర్ పోలీసులను ఆశ్రయించారు.

కాగా వారికి ఎన్‌ఓసీ ధ్రువపత్రాలు ఇప్పిస్తామని చెప్పి అదే ఠాణాలో పనిచేసే హోంగార్డు, ఓ హాస్టల్ నిర్వాహకుడు, స్థానిక బాపూనగర్ బస్తీ అధ్యక్షుడు కలిసి విద్యార్థులు, ఉద్యోగుల వద్ద డబ్బులు వసూలు చేశారు. విషయం తెలుసుకున్న సీఐ మురళీకృష్ణ దీనిపై దర్యాప్తు చేసి వారి ముగ్గురిపై చీటింగ్​ కేసు నమోదు చేసినట్టు వెల్లడించారు.

ఇదీ చూడండి:రాష్ట్రంలో కరోనా వ్యాప్తి చెందలేదు: ఈటల