స్వయం సహాయక మహిళా సంఘాలు తయారు చేసే ఉత్పత్తులు, ఆహార పదార్థాలను ఫ్లిప్కార్ట్ సంస్థ ద్వారా ఆన్లైన్లో విక్రయించనున్నారు. ఈ మేరకు ఫ్లిప్కార్ట్తో రాష్ట్ర గ్రామీణ పేదరిక నిర్మూలనా సంస్థ (సెర్ప్) ఒప్పందం చేసుకుంది. హైదరాబాద్లోని మర్రి చెన్నారెడ్డి మానవ వనరుల అభివృద్ధి కేంద్రంలో కార్యక్రమం నిర్వహించారు. పంచాయతీరాజ్ శాఖ మంత్రి ఎర్రబెల్లి దయాకర్ రావు సమక్షంలో సెర్ప్ సీఈవో సందీప్ కుమార్ సుల్తానియా, ఫ్లిప్కార్ట్ సంస్థ ఉపాధ్యక్షురాలు స్మృతి రవిచంద్రన్ ఒప్పంద పత్రాలపై సంతకాలు చేశారు.
రాష్ట్రంలో సెర్ప్ ఆధ్వర్యంలోని ఎస్హెచ్జీలు తయారు చేసే వివిధ ఉత్పత్తులను ఫ్లిప్కార్ట్ ద్వారా ఆన్లైన్లో విక్రయించే విధానాన్ని అందుబాటులోకి తీసుకొచ్చారు. ఎఫ్పీవోలు సేకరించే ధాన్యం సహా వివిధ వ్యవసాయ ఉత్పత్తులకూ అవకాశం కలుగుతుంది. తద్వారా ఫ్లిప్కార్ట్కు మార్కెటింగ్ పెరగడంతో పాటు వ్యాపార వృద్ధి జరిగి.. వినియోగదారులకు నాణ్యమైన ఉత్పత్తులు.. తక్కువ ధరకే అందుబాటులోకి రానున్నాయి.
మహిళా సంఘాలకు మంచి వేదిక.. ఈ సందర్భంగా రూ.కోట్ల వ్యాపారం జరిగే ఫ్లిప్కార్ట్ మహిళా సంఘాలకు మంచి వేదిక అని మంత్రి ఎర్రబెల్లి పేర్కొన్నారు. ఈ ఒప్పందం ద్వారా దళారీ వ్యవస్థకు చెక్ పెట్టడంతో పాటు నాణ్యమైన వస్తువులు లభిస్తాయని తెలిపారు. రూ.500 కోట్ల వ్యాపారాన్ని లక్ష్యంగా పెట్టుకున్నట్లు ఆయన వివరించారు. మన దగ్గర పండించే పంటలు, తయారు చేసే వస్తువులను అమ్మాలని సూచించిన ఎర్రబెల్లి.. గ్రామాల్లో పండే అన్ని పంటలను కొనాలని ఎఫ్పీవోలకు సూచించారు. దేశంలోనే మొదటిసారిగా మహిళా సంఘాలతో ఒప్పందం కుదుర్చుకున్నామన్న ఫ్లిప్కార్ట్ సంస్థ ఉపాధ్యక్షురాలు స్మృతి రవిచంద్రన్.. తెలంగాణ రైతులు పండించిన పంటలు భారతదేశ ప్రజలకు అందించబోతున్నట్లు చెప్పారు.