లాక్డౌన్ కారణంగా రాష్ట్రంలో పెట్రోల్‌, డీజిల్‌ విక్రయాలు భారీగా తగ్గాయి. మూడు వేలకుపైగా పెట్రోల్‌ పంపుల్లో రోజువారీ జరిగే అమ్మకాల్లో 60 శాతం కూడా జరగలేదు. మూడు వారాలుగా అమలవుతున్న లాక్డౌన్తో నిత్యావసర సరుకులు తరలించే.. వాహనాలు తప్ప మిగితావన్నీ నిలిచిపోయాయి. ఆ ప్రభావం పెట్రోల్‌, డీజిల్‌ అమ్మకాలపై పడింది. 2019 ఏప్రిల్ ఒకటి నుంచి 14 వరకు జరిగిన పెట్రోల్‌, డీజిల్‌ విక్రయాలతో ఈ ఏడాది ఏప్రిల్ ఒకటి నుంచి 14 వరకు జరిగిన అమ్మకాలతో బేరీజు వేసి చూస్తే పెట్రోల్‌ 63 శాతం, డీజిల్‌ 64 శాతం తగ్గినట్లు స్పష్టమవుతోంది.
ఈ నెల ఒకటి నుంచి 14 వరకు రెండు వారాలపాటు రాష్ట్ర వ్యాప్తంగా జరిగిన పెట్రోల్‌ డీజిల్‌ అమ్మకాలను పరిశీలిస్తే.. 2019 ఏప్రిల్ ఒకటి నుంచి 14 వరకు రెండు వారాల్లో.. 5 కోట్ల 22 లక్షల 3 వేల లీటర్లు పెట్రోల్‌ అమ్మకాలు జరిగాయి. అదే సమయంలో ఈ నెల ఒకటి నుంచి 14 వరకు కేవలం ఒక కోటి 95 లక్షల 3 వేల లీటర్లు మాత్రమే అమ్ముడు పోయింది. అంటే 3 కోట్ల 27 లక్షల లీటర్లు తగ్గినట్లు చమురు సంస్థల లెక్కలు వెల్లడిస్తున్నాయి. సాధారణ రోజుల కంటే 62.64 శాతం మేర విక్రయాలు పడిపోయాయి.