పోలీస్​ అకాడమీ సంచాలకునిగా అభయ్​ బాధ్యతల స్వీకరణ

హైదరాబాద్​లోని జాతీయ పోలీస్​ అకాడమీ సంచాలకునిగా ఒడిశా కేడర్​ ఐపీఎస్​ అధికారి అభయ్​ బాధ్యతలు స్వీకరించారు. సైబర్​, ఆర్థిక నేరాలు జాతీయ భద్రతపై శిక్షణ ఐపీఎస్​లకు పూర్తి అవగాహన కలిగిస్తామని తెలిపారు.

పోలీస్​ అకాడమీలో ఉన్న శిక్షణ ఐపీఎస్​లకు సైబర్​, ఆర్థిక నేరాలు, జాతీయ భద్రత, తీవ్రవాద సమస్యలపై స్పష్టమైన అవగాహన కలిగేలా శిక్షణ ఇస్తామని అకాడమీ సంచాలకులు అభయ్​ తెలిపారు. ఇవాళ హైదరాబాద్​లోని జాతీయ పోలీస్​ అకాడమీలో 31వ సంచాలకునిగా అభయ్​ బాధ్యతలు చేపట్టారు. క్షేత్రస్థాయి పరిస్థితులకు అనుగుణంగా ప్రత్యేక శిక్షణ ఇచ్చేలా చర్యలు తీసుకుంటామన్నారు.

అభయ్​ 1986 బ్యాచ్​కు చెందిన ఒడిశా కేడర్​ ఐపీఎస్​ అధికారి. స్వరాష్ట్రం ఒడిశాతో పాటు సీబీఐ, సీఆర్పీఎఫ్​, నార్కోటిక్​ కంట్రోల్​ బోర్డుల్లో విధులు నిర్వర్తించారు. అభయ్​ సేవలను గుర్తించిన ప్రభుత్వం జాతీయ పోలీస్​, రాష్ట్రపతి మెడల్​తో సత్కరించింది.

ఇవీ చూడండి: "ప్రతి ఒక్కరు ట్రాఫిక్​ నిబంధనలు పాటించాలి"