Multijet company Fraud: హైదరాబాద్ రామంతపూర్‌కి చెందిన నిందితుడు ముక్తీరాజ్‌ బంగారం, బొగ్గు, గ్యాస్‌పై ఆన్‌లైన్‌ ట్రేడింగ్ చేయిస్తూ లావాదేవీలు జరిగినట్లు పలువురిని నమ్మించాడు. పెట్టుబడి పెట్టాక తొలుత కొందరికి లాభాలు అందించాడు. వాటిని నమ్మి పెద్దమొత్తంలో పెట్టుబడి పెట్టాక బోర్డు తిప్పేయాలని చూశాడు. అనుమానం వచ్చి బాధితులు ఫిర్యాదు చేయడంతో ముక్తీరాజ్‌ వ్యవహారం వెలుగులోకి వచ్చింది. భారీగా పెట్టుబడులు స్వీకరించిన ముక్తిరాజ్.. సుమారు రూ.100 కోట్లకుపైనే మోసం చేసినట్లు పోలీసులు ప్రాథమికంగా గుర్తించారు.
నిందితుడు తయారు చేయించిన యాప్‌లోని లావాదేవీల ఆధారంగా ఆ మొత్తం తేల్చారు. మల్టీజెట్ ప్రైవేట్ లిమిటెడ్, రియల్ లైఫ్ ఇన్‌ఫ్రా డెవలపర్స్ సంస్థ పేరిట ఉన్న.. బ్యాంకు ఖాతాలు తనిఖీ చేయగా రూ.12 లక్షలు మాత్రమే ఉన్నట్లు గుర్తించారు. మిగిలిన డబ్బు డ్రా చేసినట్లు వివరించారు. ఇంత పెద్దమొత్తంలో డబ్బు ఎలా మళ్లించారనే కోణంలో పోలీసులు దర్యాప్తు చేస్తున్నారు. ఇందులో పెట్టుబడి పెట్టినవారికి తిరిగి ఇచ్చింది ఎంత? ఇతర అవసరాలకు ఎంత మళ్లింది? వాటిని ఏం చేశారు? తదితర వివరాలు రాబట్టేందుకు ప్రయత్నిస్తున్నారు.
ఆ సొమ్ము ఎక్కడ దాచారనే అంశంపై పోలీసులు ఆరా:కొందరు నేరుగా కార్యాలయానికి వెళ్లి డబ్బు కట్టారు. వాటిని కట్టలు కట్టి రోజూ ఓ ప్రాంతానికి తీసుకెళ్లినట్లు తెలిసింది. ఆ సొమ్ము ఎక్కడ దాచారనే అంశంపై పోలీసులు ఆరా తీస్తున్నారు . సంస్థ ఖాతాల్లోని నగదు వారం రోజుల క్రితమే ఉపసంహరించుకున్నట్లు దర్యాప్తులో వెల్లడైంది. కేసు విచారణలో భాగంగా మల్టీజెట్ ట్రేడింగ్ ప్రైవేట్ లిమిటెడ్ యాప్ తయారుచేసిన వ్యక్తిని పోలీసులు అదుపులోకి తీసుకొని ప్రశ్నిస్తున్నారు.