చెట్ల నరికివేతపై సామాన్యురాలి ట్వీట్​.. స్పందించిన ఎంపీ

చెట్లు నరికివేత విషయంపై సామాన్యురాలు చేసిన ట్విట్టర్​కు రాజ్యసభ సభ్యుడు జోగినిపల్లి సంతోశ్​ కుమార్ స్పందించారు. ఆ విషయాన్ని జీహెచ్​ఎంసీ మేయర్​ బొంతు రామ్మోహన్​ దృష్టికి తీసుకెళ్లారు. చెట్ల నరికివేతను ఆపించి.. బాధ్యులపై చర్యలు తీసుకోవాలని కోరారు. దీంతో మేయర్ రామ్మోహన్​​.. జోనల్ కమిషనర్​ ఆదేశించి జరిమానా విధించేలా చర్యలు తీసుకున్నారు.

హైదరాబాద్​ ఎల్బీనగర్ జోన్ పరిధి వనస్థలిపురంలోని ఎఫ్​సీఐ కాలనీ ఫేజ్​ 2 నందు ఏపుగా పెరిగిన చెట్లను నరికి వేస్తున్నారు. ఈ విషయాన్ని ఆ కాలనీకి చెందిన మెట్​పల్లి సురభి మొదటగా అధికారులకు ఫోన్ ద్వారా ఫిర్యాదు చేయడానికి ప్రయత్నించారు. అనంతరం ఎంపీ జోగినిపల్లి సంతోశ్ కుమార్ దృష్టికి ట్విట్టర్ వేదికగా.. చెట్లను నరికి వేస్తున్న వీడియోను పోస్ట్ చేశారు.

చెట్టును నరికివేస్తున్న రమేశ్ బాబు

తక్షణమే స్పందించిన రాజ్యసభ సభ్యుడు సంతోశ్ కుమార్ ట్విట్టర్​లో ఈ విషయాన్ని జీహెచ్ఎంసీ మేయర్ బొంతు రామ్మోహన్ దృష్టికి తీసుకువెళ్లారు. చెట్ల నరికివేతను ఆపించి వారిపై చర్యలు తీసుకోవాలని కోరారు. ఆ ట్వీట్​తో మేయర్​ బొంతు రామ్మోహన్ ఎల్బీనగర్ జోనల్ కమిషనర్ ఉపేందర్​ రెడ్డి​ని ఆదేశించారు.

చెట్ల నరికివేతపై జరిమానా విధించిన అధికారులు

ఎల్బీనగర్ జోనల్ కమిషనర్ ఉపేందర్ రెడ్డి సంఘటనా స్థలానికి వెళ్లి చెట్ల నరికివేతను ఆపించారు. దానికి బాధ్యులైన రమేశ్​ బాబుకి రూ. 25 వేలు జరిమానా విధించారు. భవిష్యత్తులో ఇలాంటి చర్యలు ఎవరూ చేసినా కఠిన చర్యలు ఉంటాయని హెచ్చరించారు. సామాన్యులు చేసిన ట్వీట్​కు తక్షణం స్పందించి.. చెట్ల నరికివేత ఆపు చేయించడంపట్ల మెట్​పల్లి సురభి, నెటిజన్లు హర్షం వ్యక్తం చేస్తున్నారు.

ఇదీ చదవండి:ఎంపీ సంతోష్​కు 'గ్రామోదయ బంధుమిత్ర పురస్కారం'