కాంగ్రెస్ అధిష్ఠానం పీసీసీ అధ్యక్షుడి ఎంపికపై కసరత్తు చేస్తున్న నేపథ్యంలో తెలంగాణ పీసీసీ వర్కింగ్‌ ప్రెసిడెంట్, మల్కాజిగిరి ఎంపీ రేవంత్ రెడ్డి దిల్లీ వెళ్లనున్నారు. ఉదయం 10 గంటల 30 నిమిషాలకు దిల్లీలో జరగనున్న డిఫెన్స్‌ కమిటీ సమావేశంలో పాల్గొనేందుకు ఆయన హస్తినకు వెళ్తున్నారు. డిఫెన్స్‌ కమిటీలో కాంగ్రెస్ పార్టీ నుంచి రాహుల్‌ గాంధీ, రేవంత్ రెడ్డి మాత్రమే సభ్యులు కావటంతో వెళ్లడం తప్పనిసరని రేవంత్ రెడ్డి వర్గీయులు తెలిపారు.
పీసీసీ అధ్యక్షుడి ఎంపికపై తీవ్ర ఉత్కంఠ నెలకొన్న ఈ సమయంలో.. రాష్ట్ర కాంగ్రెస్ నేతల అభిప్రాయాలపై పార్టీ అధిష్ఠానానికి నివేదిక అందిన తర్వాత పీసీసీ ఆశావహుల్లో ఒకరైన రేవంత్ రెడ్డి దిల్లీకి వెళ్తుండడం పార్టీలో చర్చనీయాంశంగా మారింది. అది కూడా రాహుల్‌ గాంధీతో కలిసి ఆ కమిటీ సమావేశంలో పాల్గొంటుండడం కీలకంగా భావిస్తున్నారు. రాహుల్‌ గాంధీతో ఏకాంతంగా మాట్లాడే అవకాశం రేవంత్ రెడ్డికి రావటంతో పార్టీలో పీసీసీ ఆశిస్తున్న నాయకుల్లో ఆందోళన మొదలైంది.